काठमाडौं– सत्तारूढ नेकपा एमालेको विद्यार्थी सङ्गठन अखिल नेपाल स्वतन्त्र विद्यार्थी युनियन (अनेरास्ववियु)को २४औँ राष्ट्रिय महाधिवेशन गत आइतबारदेखि काठमाडौंमा चलिरहेको छ ।

नयाँ नेतृत्व चयनका लागि बुधबार नै हुनुपर्ने मतदान प्राविधिक कारणले आज (बिहीबार) हुँदैछ ।

गत मङ्गलबार बन्दसत्र हलमा हाइकमाण्डका प्रमुख भानुभक्त ढकालले सर्वसम्मत गरौँ भन्दै अध्यक्षमा डा. सुजन कडरिया, उपाध्यक्षमा प्रकाश पौडेल र अञ्जना शिवाकोटी, महासचिवमा दीपक धामीको नाम हलमा प्रस्तुत गर्नासाथ हलले अस्वीकार गर्दै निर्वाचनको माग गरेर नाराबाजी गरेपछि हाइकमाण्ड निर्वाचन गर्न बाध्य भएको हो ।

मङ्गलबार बेलुका ६ बजेपछि उम्मेदवारी दर्ता सुरु भएको थियो । निर्वाचन कार्यतालिका अनुसार बुधबार मध्याह्न पछि निर्वाचन हुने कार्यतालिका थियो । तर पार्टीको हाइकमाण्डले चार पदाधिकारी सर्वसम्मत गराउने र सकेसम्म गलाउने नीति लिएको थियो । तर अध्यक्षका प्रत्यासी प्रकाश पौडेलले अडान नछोडेपछि बिहीबार निर्वाचन तय भएको हो ।

अहिलेको निर्वाचन बालुवाटार विरुद्ध भंगाल देखिएको छ । अर्थात एमाले पार्टी अध्यक्ष केपी ओली र पूर्व राष्ट्रपति विद्यादेवी भण्डारी ।

सरकारी टोली दुई गुटमा विभाजित 
सरकारी टोलीले अध्यक्षमा सुजन कडरिया, महासचिवमा दीपक धामी र उपाध्यक्षमा अञ्जना शिवाकोटीको लिस्ट सार्वजनिक गरेको छ । तर अर्का उपाध्यक्षमा भने नरेश रोकायाको टिमले विकास श्रेष्ठलाई बोकेको छ । गोविन्द गिरी र नारायण घर्तीको टिमले राजकुमार ढकाललाई बोकेका छन् । निर्वाचन मण्डलका एक सदस्यले ‘सरकारी टोलीमा व्यापक अन्तरघात हुन सक्ने आशङ्का’ व्यक्त गरेका छन् ।