विराटनगर । कोशी प्रदेश सभामा पहिलो पटक गैरसरकारी विधेयक दर्ता भएको छ ।

नेकपा (माओवादी केन्द्र)का सांसद गोम्बु शेर्पा र नेकपा (एकीकृत समाजवादी)की सांसद खिनु लङ्वा लिम्बूले ‘कोशी प्रदेश सरकारी कामकाजको भाषा सम्बन्धमा व्यवस्था गर्न बनेको विधेयक २०८१’ प्रदेशसभामा बुधवार दर्ता गराएका हुन् ।

प्रदेशभित्र बोलिने सबै राष्ट्रभाषाहरूको संरक्षणका लागि उक्त विधेयक दर्ता गरेको उनीहरुले बताएका छन् ।

विधेयकमा प्रदेशभित्र बोलिने सबै भाषालाई विद्यालय तहमा पठनपाठनको भाषाको रूपमा लागू गर्नुपर्ने, प्रदेश विश्वविद्यालय लगायतमा अध्ययन, अध्यापनको व्यवस्था गर्न सकिने उल्लेख गरिएको छ ।

सबै सरकारी काम कारबाही र कार्यालयमा रहने सार्वजनिक दस्ताबेजहरू प्रदेश सरकारी कामकाजमा पूर्ण प्रयोगमा आउने मैथिली र लिम्बू÷याकथुङ्ग भाषामा दस्तावेजीकरण र अभिलेखीकरण गर्ने उल्लेख छ ।