काठमाडौं- ‘जेन-जी आन्दोलन’ का क्रममा गत भदौ २३ गते सामाजिक सञ्जालमार्फत् राजीनामा दिएका अनेरास्ववियुका अध्यक्ष डा सुजन कडरिया फेरि संगठनमा फर्किएसँगै विवाद चुलिएको छ।

उनले मंगलबार बिहान अनेरास्ववियुको केन्द्रीय कार्यालयमा फर्कने प्रयास गरेपछि संगठनभित्र चर्को मतभेद देखिएको हो।

कडरियाले फेसबुकमार्फत् आफू संगठनमा फर्किएको घोषणा गर्दै सबै नेतालाई ‘घर फर्क अभियान’ मा सहभागी हुन आह्वान गरेका छन्।

उनले लेखेका छन्, ‘संकटको समयमा पार्टीको मेरुदण्ड अनेरास्ववियुले साथ छोड्नु सजिलो थिएन, तर आज पनि हाम्रो बाटो बदलिएको छैन। अब फुट्ने र फुटाउन खोज्नेहरूलाई इतिहासले गद्दार सावित गर्नेछ। घर फर्कौं, एकता नै अन्तिम उपाय हो।’

यो आह्वानसँगै समर्थकहरूले जुलुस निकाल्दै उनको स्वागत गरे। एमालेले सुरु गरेको ‘घर फर्क अभियान’अन्तर्गत कडरियासहित राजीनामा दिएका ४२ जना केन्द्रीय सदस्य पनि संगठनको नियमित गतिविधिमा फर्किएको बताइएको छ।

तर, महासचिव दीपक धामीले कडरियाको कदमप्रति आपत्ति जनाएका छन्। उनले मंगलबार वक्तव्य जारी गर्दै हुलहुज्जतसहित कार्यालय प्रवेश गर्न खोजिएको भन्दै त्यसलाई अराजक र अनुशासनहीन कार्य भनेका छन्।

वक्तव्यमा भनिएको छ, ‘कायरतापूर्वक राजीनामा दिएर अध्यक्ष पद परित्याग गरेका सुजन कडरियाले गरेको गैह्रजिम्मेवार, अराजक र अनुशासनहीन हर्कतप्रति अनेरास्ववियु घोर भत्सर्ना गर्दछ।’

धामीले संगठनको आधिकारिक फेसबुक पेज र लेटरप्याड दुरुपयोग गरेको दाबी गर्दै यस्ता गतिविधि तत्काल बन्द गर्न चेतावनी दिएका छन्।

उनले कार्यकर्तालाई भ्रममा नपर्न र संगठनको अनुशासनभित्र रही काम गर्न आग्रह गरेका छन्।

अनेरास्ववियुमा कडरियाको पुनरागमनसँगै संगठनको नेतृत्व विवाद सतहमा आएको छ। धामीको वक्तव्यमा नेतृत्वसम्बन्धी अन्तिम निर्णय संगठनको आन्तरिक विधिबाट चाँडै हुने उल्लेख छ।