काठमाडौं– प्रतिनिधिसभा अन्तर्गतको कृषि, सहकारी तथा प्राकृतिक स्रोत समितिले भदौको पहिलो साता काठमाडौंमा ‘हिन्दु कुश हिमालय संसदीय सम्मेलन’ आयोजना गर्ने भएको छ ।  

समितिले सोमबार सिंहदरबारमा पत्रकार सम्मेलन गर्दै वन, परराष्ट्र, राष्ट्रिय योजना आयोगको समन्वय र अन्तर्राष्ट्रिय एकीकृत पर्वतीय विकास केन्द्र (इसिमोड)को प्राविधिक सहयोगमा आगामी भदौ २ र ३ गते काठमाडौंमा हिन्दु कुश हिमालय संसदीय सम्मेलन आयोजना गर्न लागिएको जनाएको हो । 

राष्ट्रपति रामचन्द्र पौडेलबाट उद्घाटन हुने सम्मेलनमा नेपालका साथै भारत, चीन, बंगलादेश, भूटान, म्यानमार र पाकिस्तानका प्रतिनिधिहरूको सहभागिता रहने समितिका सदस्य सांसद वीरबहादुर बलायरले जानकारी दिए ।  सम्मेलनमा क्रममा जलवायु परिवर्तन, वातावरण प्रदूषण र जैविक विविधताका विषयमा छलफल हुने उनले बताए। 

हिन्दुकुश क्षेत्रमा जैविक विविधताको क्षति, वायु प्रदूषण, तीव्र आर्थिक तथा सामाजिक परिवर्तनले मानव जीवनमा पारेको गम्भीर असरहरू बारे ज्ञान आदान–प्रदान गर्न आयोजना लागेको सम्मेलन निकै महत्त्वपूर्ण हुने समितिले जनाएको छ । वातावरणमा आइरहेको परिवर्तनले हिमालय क्षेत्रमा परिरहेको प्रभावका विषयमा सम्मेलनमा छलफल हुने समिति सभापति कुशुमदेवी थापाले जानकारी दिइन् ।