काठमाडौं– अनलाइन टिभी पत्रकार संघले सामाजिक सञ्जाल विधेयकका प्रावधानका विषयमा संघीय संसद्को शिक्षा, स्वास्थ्य तथा सूचना प्रविधि समितिको ध्यानाकर्षण गराएको छ ।

मंगलबार संघीय संसद्को शिक्षा, स्वास्थ्य तथा सूचना प्रविधि समितिका सभापति अम्मर बहादुर थापालाई ध्यानाकर्षण पत्र बुझाउँदै संघले सामाजिक सञ्जाल सम्बन्धी विधेयकलाई संशोधनपछि मात्रै अघि बढाउनुपर्ने समेत जनाएको छ ।

संघले विधेयकले खबरदारी तथा आलोचना गर्न पाउने नागरिकको आधारभूत अधिकारलाई कुण्ठित गर्ने काम गरेको जनाएको छ । नागरिकका अधिकार हनन हुने प्रावधान हटाएर मात्रै विधेयक अघि बढाउनुपर्ने संघको भनाइ छ । संघको ध्यानाकर्षण पत्र बुझ्दै समिति सभापति थापाले विधेयकका बारेमा छलफल चलाउने प्रतिबद्धता जनाए  ।  

सरकारले संविधानप्रदत्त अभिव्यक्ति स्वतन्त्रताको मौलिक हक र प्रेस स्वतन्त्रताको मर्मविपरीत नियन्त्रणमुखी कानून बनाएर बनाउन खोजेको भन्दै सामाजिक सञ्जाल विधेयकको विरोध भइरहेको छ ।