काठमाडौं- नेकपा एमालेका वरिष्ठ उपाध्यक्ष ईश्वर पोखरेलले एमालेको एघारौँ महाधिवेशनको मतपरिणामलाई स्वीकार गर्ने बताएका छन्।

बुधबार काठमाडौँमा सम्पादकहरूसँग अन्तरक्रिया गर्दै पोखरेलले जित्दा खुसी हुनेसँगै जित्न नसक्दा पनि स्वीकारेर अगाडि बढ्नुपर्ने बताए।

‘भीम रावल र माधव नेपाल जस्तो दृष्टान्त हाम्रो हकमा लागू हुँदैन । हामी प्रतिस्पर्धा गर्छौं, विजय नभए पार्टीको पक्षमा एमाले भएर रहिरहन्छौँ’ उनले भने,‘प्रतिस्पर्धा गरिन्छ भने त्यसको परिणामलाई स्वीकार्न हामीलाई आउँछ। वाम एकताको पक्षमा हामी छौँ। पार्टी छाडेर जाने कुरा सोचेका छैनौँ।’

उनले आफूलाई कमजोर बनाउन बजारमा अनेक किसिमका हल्ला गरिएकाले त्यसको पछाडि नलाग्नसमेत आग्रह गरेका छन्।

पोखरेलले पूर्वराष्ट्रपति विद्या भण्डारीको सदस्यताबारे अब पनि कुरा उठ्नेसमेत दाबी गरेका छन्।

उनले संविधान र पार्टी विधानको अभ्यासले नै भण्डारीको सदस्यता रोक्न नसक्ने भन्दै उनले यो विषय पार्टीको एजेण्डा भएको बताए ।