काठमाडौं– नेपाल विद्युत् प्राधिकरणका कार्यकारी निर्देशक हितेन्द्रदेव शाक्यले बुधबारबाट जिम्मेवारी सम्हालेका छन् । 

सर्वोच्च अदालतको फैसलाबाट प्राधिकरणको कार्यकारी निर्देशक पदमा पुनः बहाली भएपछि शाक्य रत्नपार्कस्थित प्राधिकरणको कार्यालय पुगेर जिम्मेवारी सम्हालेका हुन् । 

सो क्रममा कार्यकारी निर्देशक शाक्यले विद्युत् प्राधिकरणले राखेका प्राथमिकताहरू कुनै परिवर्तन नहुने स्पष्ट पारे  ।

केहि ठूला जलविद्युत आयोजनालाई अघि बढाउने सरकारको घोषणालाई छिटो भन्दा छिटो कार्यान्वयन गर्ने उनले बताए ।

शाक्यले अहिलेको चुनौती विद्युत् खपत वृद्धि भएकाले यसका लागि उद्योग व्यवसायीलाई सहजीकरण गर्ने र निजी क्षेत्रले उत्पादन गर्ने विद्युतलाई खपत गर्नका लागि आवश्यक प्रसारण र वितरण गर्ने कामलाई यथाशीघ्र अघि बढाउने जिकिर गरे । 

उनले प्राधिकरणलाई अघि बढाउने आफ्नो सम्पूर्ण अनुभवका साथ काम गर्ने प्रतिबद्धता जनाए। 

त्यस्तै कार्यकारी निर्देशक शाक्यले अदालतले आफूलाई न्याय गरेको भन्दै आभार व्यक्त गरे । 

जेन-जी आन्दोलनपछि बसेको सरकारमा कुलमान घिसिङ ऊर्जामन्त्री नियुक्त भएपछि शाक्यलाई पदबाट हटाएर मनोज सिलवाललाई प्राधिकरणको कार्यकारी निर्देशकमा नियुक्त गरेका थिए । 

त्यसपछि शाक्य उक्त निर्णयकोविरुद्ध अदालत गएका थिए ।