काठमाडौं– रत्नराज्यलक्ष्मी क्याम्पस (आरआर)को स्नातक तहमा पत्रकारिता विषयमा अध्ययनरत विद्यार्थीहरुले मंगलबार राष्ट्रिय समाचार समिति (रासस)को फोटो प्रदर्शनी अवलोकन गरेका छन् । 

उनीहरूले (रासस)द्वारा आयोजित ‘पर्वतीय पर्यटनः हाम्रो शान हाम्रो पहिचान’ विषयक तस्बिर प्रदर्शनीको अवलोकन गरेका हुन्।

अठारौँ गणतन्त्र दिवसका अवसरमा आयोजित प्रदर्शनीमार्फत विद्यार्थीलाई कक्षा कोठादेखि समाचार कक्षसम्म जोडनका लागि सहयोग पुग्ने रत्नराज्यलक्ष्मी क्याम्पसका सहायक प्राध्यापक शान्तराम बिडारीले बताए।

राससका प्रधान सम्पादक उत्तम सिलवालले विद्यार्थीहरूलाई राससबारे जानकारी गराउँदै फोटो प्रदर्शनीसँगै राससको सङ्ग्रहालय, समाचार सङ्कलन र सम्पादन कक्षको अवलोकन गराएका थिए । त्यस्तै अध्यक्ष धर्मेन्द्र झाले विद्यार्थीहरूलाई समितिको भवन भित्र रहेको सङ्ग्रहालय देखाउँदै त्यहाँ रहेको प्राविधिक सामाग्रीहरूको बारेमा जानकारी गराएका थिए ।

साथै फोटो कार्यक्रम र रासससँग सम्बन्धित पुस्तकहरू राससद्धारा क्याम्पसलाई हस्तान्तरण गरिएको थियो ।