काठमाडौं– काठमाडौं महानगरपालिकाले आयोजना गरेको सिप मेला २०८२ मा खोटाङका दुई पालिकाका मेयरले अवलोकन गरेका छन् । हलेसी तुवाचुङ् नगरपालिकाका प्रमुख विमला राई र दिक्तेल रुपाकोट मझुवागढी नगरपालिकाका प्रमुख तीर्थराज भट्टराईले मंगलबार मेला अवलोकन गरेका हुन् । 

दुवै मेयरले मेला एकीकृत भएको महसुस गरेको प्रतिक्रिया दिएका छन् । काठमाडौंले मेला आयोजना गरेर उदाहरण स्थापित गरेको बताएका छन् ।

यसलाई संघ र प्रदेश सरकारले नीति योजना तथा कार्यक्रममा समावेश गरेर हरेक पालिकामा प्रवर्धन गर्नुपर्ने मेयरहरुको भनाई थियो । 

मानव पुँजी पलायन हुनबाट रोक्न यो काम अहिले अति जरुरी भएको र यस्तो मेलाले सहयोग गर्ने उनीहरूको भनाई थियो । 
तालिम सकिए पनि कार्यक्रम नियमित हुनु मेलाको सबैभन्दा सबल पक्ष लागेको मेला अवलोकन गर्ने आएका मेयरहरूले प्रतिक्रिया दिएका थिए । 

तालिम सञ्चालन विधि, प्रशिक्षणको पाठ्यक्रम, पाठ्य सामग्री र प्रयोगात्मक सिपका विषयमा तालिम संयोजक देवेन्द्र केसीले मेयरहरूलाई जानकारी गराएका थिए । 

जेठ ७ गतेदेखि सुरु भएको मेलामा १० क्षेत्रका ३७ पेसासँग सम्बन्धित तालिम चलिरहेका छन् । हरेक दिन ३ सिफ्टमा प्रशिक्षण चल्छन् ।