काठमाडौं – स्पार्कल इन्टरटेन्मेन्टको आयोजनामा सञ्चालन हुन गइरहेको मिस एण्ड मि. आइडल सिजन २ को प्रशिक्षण कार्यक्रम बैशाख ६ गतेदेखि सुरु हुने भएको छ ।

आयोजकले आज काठमाडौंमा पत्रकार सम्मेलन गरि प्रतियोगितासम्बन्धी विस्तृत जानकारी सार्वजनिक गरेको हो । प्रतिभाशाली बालबालिकाहरूलाई राष्ट्रिय तथा अन्तर्राष्ट्रिय स्तरमा अगाडि ल्याउने लक्ष्यका साथ प्रतियोगिताको आयोजना गरिएको बताइएको छ ।

सन् २०१९ मा अवधारणा तयार गरी २०२० मा स्थापना भएको स्पार्कल इन्टरटेन्मेन्टले यसअघि २०२१ मा ‘मिस तथा मिसेस युनिभर्सल’ कार्यक्रम सफलतापूर्वक सम्पन्न गरिसकेको छ । त्यसैको निरन्तरता स्वरूप यो वर्ष सिजन २ को आयोजना गरिएको आयोजनकले जनाएको छ ।

प्रतियोगितामा ५ देखि १५ वर्ष उमेर समूहका बालबालिकाहरूले सहभागिता जनाउन सक्नेछन्। सहभागीहरूलाई उमेरका आधारमा तीन समूहमा विभाजन गरिएको छ – समुह ए (५–८ वर्ष), समुह बी (९–१२ वर्ष), र समूह सी (१३–१५ वर्ष)। समूह ए र बि का लागि शुल्क १० हजार तोकिएको छ भने समूह सी का लागि शुल्क १० हजार रुपैयाँ निर्धारण गरिएको छ। तर चैत २९ गतेभन्दा अगाडि आवेदन दिने सहभागीहरूलाई विशेष छुट दिइने आयोजकले जनाएको छ ।

प्रतियोगिताको प्रशिक्षण कार्यक्रम बैशाख ६ गतेदेखि प्रत्येक शनिबार त्रिपुरेश्वरको वर्ल्ड ट्रेड सेन्टरमा हुनेछ। फाइनल कार्यक्रम जेठ ३ गतेका लागि तोकिएको छ। प्रतियोगितामा ट्यालेन्ट शो, ब्यूटी शो, तीनवटा फोटोषुट, १५–१९ सेकेन्डको भिडियो प्रस्तुति, तथा आयोजकबाट प्रदान गरिने टि–शर्ट समावेश गरिनेछ। अन्य आवश्यक पोशाक भने सहभागीले आफैंले ल्याउनु पर्नेछ।