धरान– अविरल वर्षा र बाढीका कारण सुनसरीमा मौसमी तथा बेमौसमी तरकारीखेतीमा ठूलो क्षति पुगेको छ । गत असोज १७ गतेदेखि सुरु भएको अविरल वर्षासँगै आएको बाढीका कारण जिल्लाका किसानहरूले लगाएका बालीहरू डुबानमा परेका हुन् ।

बाढीका कारण बराहक्षेत्र नगरपालिका–९ ढोलबजियामा रहेको ‘सुन्दर कृषि फार्म’को तरकारी खेतीमा पूर्ण रुपमा क्षति पुगेको छ । वैदेशिक रोजगारीबाट फर्किएका तीन जना युवाले २०७४ सालदेखि उक्त फार्म  सञ्चालन गर्दै आएका थिए । फार्म सञ्चालक अमिर निरौलाका अनुसार बाढीले फार्मका सबै तरकारीखेती डुबानमा परेर पूर्णरूपमा नष्ट भएको छ ।

उनले भने, ‘पानीले टनेल र मल्चिङ् सबै डुबायो । दुई बिघाभन्दा बढी क्षेत्रफलमा लगाइएको टमाटर सबै डुबानमा पर्यो । साथै, करेला, बैगुन, क्यापसिकम, काँक्रा, बोडी, फर्सी, घिरौंलालगायतका सबै बाली बाढीबाट नष्ट भएको छ ।’

अमिर निरौला र रघुवीर चन्द्रवंशी दक्षिण कोरियामा र छविलाल चौधरी अफगानिस्तानमा काम गरेर फर्किएपछि डेढ बिघा जग्गाबाट छ लाखको लगानीमा तरकारीखेती सुरु गरेका थिए। अहिले उनीहरूले करिब २० बिघा क्षेत्रफलमा काँक्रा, टमाटर, क्यापसिकम, बोडी, करेला, लौका, कोभीलगायतका तरकारीखेती गर्दै आएका छन् ।

निरौलाका अनुसार मल्चिङ्, बिरुवा र बिउमा गरिएको रु १४ लाखभन्दा बढीको लगानी खेर गएको छ । कृषक छविलाल चौधरीका अनुसार गत वर्ष मात्रै तरकारीखेतीबाट एक करोड रुपैयाँभन्दा बढीको कारोबार गरिएको थियो । 

कृषि ज्ञान केन्द्र सुनसरीका सूचना अधिकृत प्रविणलाल श्रेष्ठका अनुसार बाढी र अविरल वर्षाले जिल्लाभरका तरकारी बालीमा ठूलो क्षति पुर्‍याएको छ ।

उनले भने, ‘सुनसरीमा करिब आठ हजार १५३ हेक्टरमा तरकारीखेती हुने गरेको छ, जसमा हालैको बाढीले करिब ९५ प्रतिशतमा क्षति पुगेको छ । त्यस्तै, ५१० हेक्टरमा गरिएको केराखेतीमध्ये ८० प्रतिशत र ४८ हजार ९ हेक्टरमा गरिएको धान खेतीमध्ये ४८ प्रतिशतमा क्षति पुगेको छ ।’

विशेष गरी सुनसरीका देवानगञ्ज, भोक्राहा, इनरुवा, हरिनगर र कोशी गाउँपालिकामा बढी क्षति पुगेको छ ।