काठमाडौं– सत्तारुढ दल नेपाली कांग्रेसका महामन्त्री गगनकुमार थापाले प्रधानमन्त्री केपी शर्मा ओलीलाई अबिलम्ब पद छाड्न आग्रह गरेका छन् ।

सोमबार जेन–जी पुस्ताले गरेको आन्दोलनका क्रममा अबोध युवाहरू अनाहकमा मारिएको घटनाले रातभर सुत्न नसकेको उल्लेख गर्दै उनले परिस्थितिको आँकलन गर्दै पदबाट राजीनामा दिन आग्रह गरेका हुन् ।

उनले लेखेका छन्– ‘रातभर सुत्न सकिन । म जस्तै देशभित्र र बाहिर रहेको सिङ्गो नेपाल सुत्न सकेको छैन । अबोध युवाहरू अनाहकमा मारिएको त्यो क्रुर दृष्य आँखा अगाडि घुमिरहेको छ। प्रधानमन्त्रीज्यूले यो दमनको जिम्मा लिएर अविलम्ब पद छोड्नुपर्छ।’ 

मङ्गलबार बिहान सामाजिक सञ्जाल फेसबुकमार्फत महामन्त्री थापाले अब नेपाली कांग्रेस एक दिन पनि यो परिस्थितिको थप साक्षी र साझेदारका रुपमा रहन नहुने भन्दै तत्काल सरकारबाट फिर्ता हुनुपर्ने बताएका छन् । उनले पार्टीको बैठकबाट यो निर्णय गराउन आफू लागिपर्ने उल्लेख गरेका छन् ।

उनी लेख्छन्– ‘अब नेपाली कांग्रेस एक दिन पनि यो परिस्थितिको थप साक्षी र साझेदारका रुपमा रहनु हुँदैन, रहन सक्दैन । नेपाली कांग्रेस सरकारबाट तत्काल फिर्ता हुनुपर्छ । पार्टीको बैठकबाट यो निर्णय गराउन म लाग्नेछु ।