काठमाडौं– कैलाली कारागार कैदी–बन्दीले नियन्त्रणमा लिइरहँदा सुदूरपश्चिमका मुख्यमन्त्री कमलबहादुर शाहले गृहमन्त्री रमेश लेखकसँग भेट गरेका छन् । उनले शनिबार भैंसेपाटीस्थित सरकारी निवासमा गृहमन्त्री लेखकसँग भेट गरेका हुन् ।  

भेटका क्रमा कैलाली कारागारमा भएको घटनाको विषयसँगै सुदूरपश्चिम प्रदेशको शान्ति सुरक्षा र विपद् व्यवस्थापनका विषयमा छलफल भएको मुख्यमन्त्रीको सचिवालयले जनाएको छ । 

शुक्रबार राति कैलाली कारागारभित्र कैदी–बन्दीबीच झडप हुँदा धनगढी उपमहानगरपालिका ४ का भरत चौधरीको मृत्यु भएको थियो । झडपमा परी ४७ जना घाइते भएका छन् । घाइतेहरूको उपचार भइरहेको छ ।

झडपबाट भएको क्षतिबारे यकिन तथ्य बाहिर आउन सकेको छैन । कैदी–बन्दीहरूले भित्रबाट ताला लगाएर थुनुवाकक्षको मूल गेटमा ग्याँस सिलिन्डर राखेका छन् । कोही भित्र प्रवेश गरे सिलिण्डर पड्काएर आगो लगाइदिने उनीहरूले चेतावनी दिएका छन् ।