काठमाडौं– प्रमुख प्रतिपक्षी नेकपा (माओवादी केन्द्र) को युवा संगठन योङ कम्युनिष्ट लिग (वाईसीएल) नेपालले ७४ जना पदाधिकारी भएको केन्द्रीय समिति चयन गरेको छ ।

वाईसीएलले काठमाडौंमा भर्खरै सम्पन्न तेस्रो राष्ट्रिय सम्मेलनबाट पुष्प ओलीको नेतृत्वमा ७४ पदाधिकारीसहितको केन्द्रीय समिति चयन गरेको हो ।

वाईसीएलको केन्द्रीय समितिमा २२ जना उपाध्यक्ष, एक जना महासचिव, १९ जना सहसचिव र ३१ सचिवहरू राखिएको छ । जसमध्ये उपाध्यक्ष र उपमहासचिवमा सबै पदाधिकारीहरू खुलातर्फ चयन भएका हुन् ।

वाईसीएलले ३१ सचिवमध्ये महिलातर्फ ५ र आदिवासीतर्फ ३ जनालाई राखेको छ । एक जना सहसचिव मधेशी-मुस्लिम-अल्पसंख्यकतर्फ चयन गरिएको छ । सुदूरपश्चिमबाहेकका प्रदेशबाट ६ जनालाई प्रदेशबाट सचिवका रूपमा वाईसीएलले सचिव बनाएको छ ।

वाईसीएलको अधिवेशन सम्पन्न गर्न गठन भएको केन्द्रीय निर्वाचन समितिले कोशी प्रदेश नामाकरण भइसक्दा पनि ‘१ नम्बर प्रदेश’ भनेर उल्लेख गरेको छ ।

समितिले केन्द्रीय समिति चयन बारे जारी गरेको सूचनामा एक जना सचिव (माधव भण्डारी) को नाम ‘विशेष गैर भौगोलिक’ समूह अन्तर्गत राखेको छ ।

वाईसीएलले केन्द्रीय समितिको महासचिवमा गणेश शाहीलाई चयन गरिएको जनाएको छ । केन्द्रीय निर्वाचन समितिले सार्वजनिक गरेको केन्द्रीय समितिको पदाधिकारीको नामावलीमा कोषाध्यक्ष चयन गरिएको छैन ।

वाईसीएलको महाधिवेशन काठमाडौंमा ६ दिनसम्म चलेको थियो । वाईसीएलका नेताहरूले महाधिवेशनलाई अखिल क्रान्तिकारीमा जस्तै निर्वाचनमा लान चाहेका थिए । तर अध्यक्ष पुष्पकमल दाहालले हस्तक्षेप गरेर सर्वसम्मतिका नाममा पुष्प ओलीलाई अध्यक्ष बनाइदिएका छन् ।