धनगढी– सुदूरपश्चिम प्रदेशको अस्थायी राजधानी धनगढीमा सुविधायुक्त सभागृह सञ्चालनमा आएको छ । सङ्घीय सरकारको ३२ करोड २५ लाख ९७ हजार लगानीमा निर्माण भएको सभा गृह आइतबारदेखि औपचारिक रूपमा सञ्चालनमा आएको हो । सभा गृहको प्रधानमन्त्री केपी शर्मा ओलीले उद्घाटन गरेका छन् । 

सुदूरपश्चिम विश्वविद्यालयको पाँचौँ दीक्षान्त समारोहमा भाग लिन र सुदूरपश्चिम प्रदेश सभामा विशेष सम्बोधनका लागि धनगढी पुगेका प्रधानमन्त्री ओलीले सभा गृहको पनि उद्घाटन गरेका हुन् । धनगढीमा बनेको सभा गृह यो नै पहिलो हो । धनगढी उपमहानगरपालिका–८ धनगढी गाउँमा सभा गृह निर्माण गरिएको छ । 

सहरी विकास तथा भवन निर्माण विभाग, सङ्घीय आयोजना कार्यान्वयन इकाइ, धनगढीले निर्माण गरेको सभा गृह उद्घाटनसँगै धनगढी उपमहानगरपालिकालाई हस्तान्तरण गरिएको छ । प्रधानमन्त्री ओलीले धनगढी उपमहानगरपालिकाका नगर प्रमुख गोपाल हमाललाई सभा गृह हस्तान्तरण गर्दै उद्घाटन गरेका हुन् ।

सभागृह अभावमा ठूला कार्यक्रमका लागि होटलका हलहरूको विकल्प थिएनन् । सभा गृह उद्घाटन सँगै ठूलो सभा सम्मेलन र गोष्ठी आयोजनाका लागि सहज हुने देखिन्छ । उद्घाटन गर्दै प्रधानमन्त्री ओलीले देशमा केही भएको छैन भन्नेहरूका लागि एक उदाहरण सभा गृह रहेको बताए । 

ओलीले देश विकासको बाटोमा अगाडि बढिरहेको छ । एउटा प्रमाण यो हो । यो नै विकाश भइरहेको गतिलो प्रमाण हो । धनगढीले एक उपहार प्राप्त गरेको छ । यसलाई सदुपयोग गर्नुहोस् । गोष्ठी, सेमिनारहरू सञ्चालन गर्न आग्रह गरेका छन् ।

सहरी विकासले २०७५ माघ २ गते सभा हल निर्माणका लागि सम्झौता गरेको थियो । जुनबेला ओली सरकारको नेतृत्वमा थिए । ओली सरकारकै नेकपा कालिन समयको सरकारले सभा गृह निर्माणको अवधारण सहित बजेट विनियोजन गरेको थियो । निर्माण कम्पनीले २०७९ असार २४ गते निर्माण सकाएर ‘धनगढी सभा गृह’ सहरी विकासलाई हस्तान्तरण गरेको हो ।

सभा गृह (सिटी हल) बिकेवाई एमके रोयल जेबीले निर्माण गरेको हो । धनगढी उपमहानगरपालिका–८ मा एक बिघा क्षेत्रफलमा सभा गृह निर्माण गरिएको छ । सभा गृहको मुख्य हलमा सात सय ५३ जनाको क्षमता रहेको छ । भने दोस्रो तालिम हलमा दुई सय १० जनाको क्षमता रहेको छ । 

सभा गृहमा ४६ वटा कारहरू र ९८ वटा मोटरसाइकल एक साथ प्राकिङ्ग गर्न सकिने छन् । विशिष्ट व्यक्तिका लागि खाना खाने ठाउँ पनि सभा गृहमा निर्माण गरिएको छ । सभा गृह भित्रै प्रशासनिक कक्ष, चेन्जिङ रुम, विशिष्ट कक्षको व्यवस्था रहेको हो । सभागृहलाई सुदूरपश्चिमकै सुविधा सम्पन्न हलको रूपमा हेरिएको छ ।