काठमाडौं- नेकपा एमालेका उपाध्यक्ष सुरेन्द्र पाण्डेले पार्टीलाई केही व्यक्तिको निर्णयमा चलाउने प्रवृत्ति बढ्दा जनताबाट टाढिँदै गइरहेको टिप्पणी गरेका छन् । 

काठमाडौंमा एघारौं महाधिवेशनबारे आयोजित अन्तर संवादमा उनले एमाले साँघुरिँदै, खुम्चिँदै र आइसोलेसनतिर धकेलिँदै गएको अवस्था देखिएको बताए। 

लोकतान्त्रिक इतिहास बोकेको पार्टीमा व्यक्तिवाद हावी हुँदै जाँदा नयाँ पुस्ता पनि आकर्षित हुन छाडेको उनले बताएका छन्। चुनाव नहुने, प्रतिस्पर्धा गर्न नपाइने र शीर्षबाट लिस्ट झर्ने संरचनामा नयाँ पुस्ता आउने सम्भावना नै नदेखिने उनको भनाइ छ।

पाण्डेले यो संरचना बदल्न कानुनी र संवैधानिक दुवै स्तरमा काम आवश्यक भएको बताए। पार्टीमा एउटै व्यक्ति दुई कार्यकालभन्दा बढी अध्यक्ष बन्न नपाउने व्यवस्था कानुनमै राख्नुपर्ने माग उनको थियो।

समस्या पुराना पार्टीमै होइन, नयाँ बनेका दलमा पनि उस्तै रूपमा बढ्दै गएको उनले बताएका छन् । नयाँ पार्टीका नेतृत्वले पनि अध्यक्ष पद छाड्न नचाहने प्रवृत्ति देखिएको भन्दै उनले चिन्ता व्यक्त गरेका छन् ।