काठमाडौं– गृहमन्त्री ओमप्रकाश अर्यालले वर्तमान अवस्थामा व्यवसायीले मन्त्रीलाई रिझ्याउनुपर्ने अवस्था नरहेको बताएका छन् ।

शुक्रबार उद्योग वाणिज्य महासंघले काठमाडौंमा आयोजना गरेको कार्यक्रममा बोल्दै उनले ढुक्कसँग सरकारको कमजोरी औँल्याउन व्यवसायीलाई आग्रह गरेका हुन् । 

‘अहिले मन्त्रीलाई रिझ्याउँनुपर्ने अवस्था छैन्, पहिलेका मन्त्री के ढंगका थिए, अहिलेका के ढंगका छन् काम हेरेर कमजोरी र सुधार औँल्याइदिनुहोला, उनले भने ।

नीजि क्षेत्रको मनोबल उच्च बनाउन सुरक्षाको प्रत्याभूति दिलाउँदै विशेष रणनीति ल्याउने पनि उनले बताए । 

‘आन्दोलनपछिको अवस्था मत्थर बनाउन केही समय लाग्यो, यतिबेला निजी क्षेत्रको संकट समाधानका लागि उजुरी लिन सुरु भइसकेको छ, अर्थतन्त्रको आधारशिला निजी क्षेत्रलाई बलियो बनाउन सरकार लाग्नेछ, जसमा ७ सय १० वटा हातहतियार फिर्ता आएका छन्, १४ हजार ५ सय ४९ जना फरार भएकोमा ९ हजार ५ सय २१ जना कैदीबन्दी पुनः कारागारमा ल्याइएका छन् भने ५ हजार १ सय ५ जना अझै बाहिरनै हुनुहुन्छ । त्यसका लागि हामी विशेष अपरेसन चलाउँछौँ र त्यसमा नागरिकले पनि सघाउनुपर्छ,’ उनले बताए ।

नीजि क्षेत्र तथा व्यवसायीको सुरक्षाका लागि आगामी दिनमा थप योजना बनाएर लाग्ने उनले आश्वासन दिए ।

साथै उनले फरार कैदीबन्दी र लुटिएका हतियार फिर्ता ल्याउन सरकारले विशेष अपरेशन सञ्चालन गर्ने समेत उल्लेख गरेका छन् ।