काठमाडौं– पूर्व-मुख्यसचिव लीलामणि पौडेलले प्रत्यक्ष निर्वाचित कार्यकारी प्रणालीले देशमा स्थायित्व ल्याउँछ भन्ने धारणा भ्रामक भएको बताएका छन्।

अन्तर्राष्ट्रिय सम्बन्ध सरोकार समुदाय नेपालले आयोजना गरेको ‘जेन–जी आन्दोलनपछिको नेपालको राजनीतिक पद्धति र परराष्ट्र नीति’ विषयक गोष्ठीमा बोल्दै चीनका लागि पूर्वराजदूतसमेत रहेका पौडेलले यस्तो प्रणाली हाम्रो जस्तो देशमा उल्टै समस्या ल्याउन सक्ने बताए।

उनले प्रत्यक्ष निर्वाचित गरेर गएको मान्छे सन्की हुँदा दुर्घटना भएका कयौँ उदाहरण रहेका बताएका छन् ।

 ‘सन्की मान्छे सरकारमा पुग्यो भने के हुन्छ ? संसद्मा अर्को दलको बहुमत भयो भने प्रत्यक्ष निर्वाचित कार्यकारीले के गर्ला?, पौडेलले प्रश्न गर्दै भने, ‘त्यस्तो प्रणालीमा पनि ठूलो भ्रष्टाचार हुन्छ, नीति निर्माण तहमा हितको टकराव रहन्छ।’

उनले प्रत्यक्ष निर्वाचित कार्यकारीलाई निरंकुश हुन नदिने प्रावधान राखे पनि व्यावहारिक समस्याहरू रहने उल्लेख गरे।

उता परराष्ट्र नीतिबारे बोल्दै उनले आधारभूत परिवर्तनको खाँचो रहेको उल्लेख गरे ।

 ‘हाम्रो परराष्ट्र नीतिमा आधारभूत परिवर्तन हुन सकेको छैन। यो देशको सिमाना हाम्रा पूर्वजहरूले बेलायती साम्राज्यसँगको युद्ध जितेर सुरक्षित गरेका हुन्। त्यसैले परराष्ट्र नीतिमा कहीँ चुक्नु हुँदैन,’ उनले भने । 

उनले देशभित्रका जनतालाई सीप र क्षमता विकासमा जोड दिनुपर्ने बताए। जेन–जी आन्दोलनका एजेन्डाहरूलाई दीर्घकालीन रूपमा संस्थागत गर्न अब संरचनागत र नीतिगत स्तरमा आधारभूत परिवर्तन आवश्यक भएको उनको भनाइ थियो।