काठमाडौं – सरकारद्वारा जेनजी आन्दोलनमाथि गरिएको दमनप्रति राष्ट्रिय प्रजातन्त्र पार्टी (राप्रपा)का सांसद ज्ञानेन्द्र शाहीले कडा आपत्ति जनाएका छन् । उनले सोमबार सामाजिक सञ्जालमार्फत प्रधानमन्त्री र गृहमन्त्रीमाथि ‘नरसंहार’ को मुद्दा दर्ता गरी जेल पठाउनुपर्ने माग गरेका छन् ।

शाहीले लेखेका छन्, “यो राजीनामा माग्ने समय होइन, हत्याकाण्ड मच्चाउनेहरूलाई हत्कडी लगाएर जेल हाल्नुपर्छ।” उनले सरकारको बल प्रयोगलाई निरंकुश प्रवृत्तिको पराकाष्ठा भएको टिप्पणी गर्दै दोषीलाई कानुनी दायरामा ल्याउन दबाब दिएका छन् ।

शिक्षा, स्वास्थ्य, रोजगारी र भ्रष्टाचारविरुद्ध जेन जेजी पुस्ताले सुरु गरेको आन्दोलन सोमबार काठमाडौंसहित देशका विभिन्न शहरमा तीव्र भएको थियो । माइतीघर मण्डला, बानेश्वर लगायतका स्थानमा हजारौं युवाले सरकारविरुद्ध प्रदर्शन गरेका थिए । आन्दोलनलाई शान्तिपूर्ण ढंगले सम्बोधन गर्ने सट्टा सरकारले दमनकारी शैली अपनाएको भन्दै नागरिक समाज र विभिन्न राजनीतिक दलले आलोचना गरेका छन् ।

काठमाडौँलगायतका स्थानमा प्रदर्शन नियन्त्रण बाहिर जाँदा प्रहरीसँग झडप भएको थियो । केही प्रदर्शनकारी घाइते भएको खबर आएको भए पनि यसको आधिकारिक विवरण भने सार्वजनिक भएको छैन ।