काठमाडौं– नेपाली कांग्रेसले संघीय संसद र प्रदेशसभालाई मर्यादित बनाउनका लागि प्रभावकारी भूमिका निर्वाह गर्न पार्टीका तर्फबाट प्रतिनिधित्व गर्ने सांसदहरूलाई निर्देशन दिएको छ ।

सोमबार राति सम्पन्न केन्द्रीय कार्यसमिति बैठकले प्रतिनिधिसभा, राष्ट्रियसभा र प्रदेशसभाका सांसद र संसदीय दललाई मर्यादित भूमिका निर्वाह गर्न निर्देशन दिएको हो ।

‘संसदलाई मर्यादित, व्यवस्थित र गरिमामय बनाउन प्रभावकारी भूमिका निर्वाह गर्न नेपाली कांग्रेसबाट प्रतिनिधित्व गर्ने प्रतिनिधि सभा, राष्ट्रिय सभा र प्रदेश सभाका माननीय सदस्य एवं संसदीय दललाई यो बैठक निर्देशित गर्दछ,’ बैठकपछि मध्यरातमा जारी विज्ञप्तिमा भनिएको छ ।

संसद जनताको सार्वभौम अधिकारको प्रतिनिधित्व गर्ने राज्यको सर्वोच्च अंग भएको स्मरण गर्दै कांग्रेसले संसदको सञ्चालन, व्यवस्थापन र सांसदहरूको आचरण, व्यवहार तथा प्रस्तुत हुने कार्यशैली र क्षमताले नै संसदको गरिमालाई उजागर गर्ने र राष्ट्रको प्रतिष्ठा कायम हुने विज्ञप्तिमा जनाइएको छ ।

आगामी आर्थिक वर्षको बजेट ल्याउन नसकेका पालिकाहरूलाई कांग्रेसले समयमै बजेट, कार्यक्रम तथा योजनाहरू प्रस्तुत गरी जनप्रतिनिधि र स्थानीय सरकारप्रति जनताको विश्वास र भरोसा कायम गर्न पनि बैठकमार्फत् अपील गरेको छ ।

स्थानीय सरकारको कार्यशैली र राजनीतिक समझदारीको अभावमा केही पालिकाहरुले हालसम्म पनि बजेट प्रस्तुत गर्न नसकेको स्थितिप्रति पार्टीको गम्भीर ध्यानाकर्षण भएको विज्ञप्तिमा जनाइएको छ ।

सरकारले निजी क्षेत्रलाई चलायमान बनाउन संसदबाट पारित गरेका नागरिकता ऐन, भ्रष्टाचार निवारण ऐनजस्ता महत्वपूर्ण ऐन पास गरी सुशासनको क्षेत्रमा केही सुधारका कदमहरु अगाडि बढाएको कांग्रेसको ठहर छ ।

निजामती सेवा विधेयकसम्बन्धी संसदीय समितिको प्रतिवेदनमा देखिएका गडबडी र कमीकमजोरीलाई संसदीय प्रक्रियाबाटै समाधान गरी संसदको गरिमा र विश्वसनीयतालाई कायम राख्नु पर्नेमा कांग्रेसको जोड छ ।