काठमाडौं – सङ्घीय सरकारले आगामी आर्थिक वर्षका २०८२/०८३ का सुनसरीको वराहक्षेत्र नगरपालिकाको भौतिक निर्माणका लागि ३७ करोड ८१ लाख रुपैयाँ विनियोजन गरेको छ ।

वराहक्षेत्र वडा नं. १ मा रहेको प्रसिद्ध धार्मिक स्थल वराहक्षेत्र मन्दिर परिसर बाढीको जोखिममा रहेको विषयमा बजेट मौन रहेको भन्दै स्थानीयले गुनासो गरेका छन् । वराहक्षेत्र मन्दिरलाई बचाउने विषयमा बजेटले सम्बोधन नगरेको वराहक्षेत्र मन्दिर गुठी व्यवस्थापन समितिका कोषाध्यक्ष रवि श्रेष्ठले गुनासो गरे । उनले भने, ‘घाउ आँखामा छ, ओखती नाकमा लगाएजस्तो भयो ।’

यद्यपि बजेटमा वराहक्षेत्र मन्दिर परिसर पूर्वाधार स्तरोन्नतिका लागि संघीय सरकारले सशर्तअनुदान अन्तर्गत ४० लाख रुपैयाँ बजेट विनियोजन गरेको छ । यस्तै वराहक्षेत्र धाम स्तरोन्नति तथा सौन्दर्यीकरणका लागि ३ करोड रुपैयाँ छुट्याएको छ । तर स्थानीयले सौन्दर्यीकरणभन्दा पनि बाढीपहिरोको चपेटामा रहेको मन्दिर क्षेत्रलाई दीगो तटबन्ध गर्ने विषय सुनुवाइ नभएको बताए ।

वराहक्षेत्र मन्दिर गुठी व्यवस्थापन समितिले वराहक्षेत्रको तटबन्धलगायतमा काम गर्नुपर्ने भन्दै गुरुयोजना निर्माण गरी सम्बन्धित मन्त्रालयमा पेश गरेको थियो । तर बजेटमा सम्बोधन हुन सकेन ।

‘केन्द्र सरकारको बजेट वराहक्षेत्रधामको स्तरोन्नति र सौन्दर्यकरणमा पनि खाँचो छ हुँदै नभएको होइन । तर त्योभन्दा पहिलो प्राथमिकता वराहक्षेत्रधाम बचाउने तथा संरक्षण गर्ने हो ।’ गुठी व्यवस्थापन समितिका कोषाध्यक्ष श्रेष्ठले भने, हामीले केन्द्र सरकारमै कुरो पु¥याएको थियौँ । तर आवश्यक शीर्षकमा बजेट विनियोजन भएन ।’

सप्तकोशी नदी र कोका खोलामा आउने बर्सेनिको बाढीपहिरोले वराहक्षेत्र मन्दिर साथै गाउँबस्ती अत्यन्त जोखिममा रहेको श्रेष्ठले बताए । विनियोजित शीर्षकलाई रकमान्तर गरेर भए पनि तटबन्ध गर्नुपर्ने उनले बताए ।

‘वराहक्षेत्रधाम गाउँबस्ती रहे न त्यसलाई सिँगार्ने हो, बनाउने हो सौन्दर्यीकरण, स्तरोन्नति गर्ने हो । वराहक्षेत्र धाम नै नरहे केका लागि त्यहाँ बाटो पुर्‍याउने, विकासका लागि ठूलाठूला संरचना बनाउने ?’ कोषाध्यक्ष श्रेष्ठले प्रश्न गरे ।