काठमाडौं–  राष्ट्रिय स्वतन्त्र पार्टीले पार्टीमा मूल्य मान्यता स्थापना गर्ने चक्र पूरा गर्न नसक्दा कयौँ कमजोरी र समस्याहरू बढ्दै गएको स्वीकार गरेको छ । 

चितवनको सौराहमा कार्यवाहक सभापति डिपी अर्यालले राजनीतिक प्रतिवेदन प्रस्तुत गर्दै पार्टीमा राजनीति र सांगठनिक अनुभव सीमित रहेको र आफैँले सोच र जनस्तरले चाहे जसरी संगठन विस्तार गर्न नसकेको स्वीकार गरेका छन् । 

अर्याले जारी गरेको प्रतिवेदनमा आफू आबद्ध रहेको दल खराब लागेपछि त्यागेर त्यहाँ एकीकृत हुनेसँग पनि पुरानै चरित्र र प्रविधि कायम भएको र रास्वपालाई नि पहिलो राजनीतिक दल छान्नेहरूसँग पनि राजनीतिक ज्ञान र चरित्रको कमी भएको स्वीकार गरिएको छ ।

‘स्विकार्न सक्नुपर्छ कि पार्टी स्थापनाको केही वर्ष मात्र भएकाले हामीसँग संस्थागत राजनीतिक र सांगठनिक अनुभव सीमित छ । अनि आफैले सोचेर जनस्तरले चाहे जसरी हामीले सांगठनिक विस्तार गर्न सकेका छैनौँ । जे जति गरेका छौँ त्यो पनि समस्यारहित छैन । हामी कि विभिन्न दलबाट बाहिरिएर वा कि पहिलो पटक राजनीतिक दल रोजेर यहाँ आबद्ध भएका छौँ आफू आबद्ध रहेको दल खराब लागेपछि त्यागेर त्यहाँ एकीकृत हुने सँग पनि पुरानै चरित्र र प्रवृत्ति कायम छ भने रास्वपालाई पहिलो राजनीतिक दल छान्नेसँग पनि राजनीतिक ज्ञान र चरित्रको कमी छ ।’ प्रतिवेदनमा भनिएको छ,’अर्कातिर पार्टीले प्रशिक्षित गर्ने नसक्दा हामी पुरानो चरित्र र प्रविधिबाट मुक्त भएर राजनीतिक चरित्र उन्मुख हुन सकेका छैनौँ अर्थात् हामीले अहिलेसम्म रास्वपाको आफ्नै स्कुलिङ मूल्य मान्यता स्थापित गर्न चक्र पुरा गर्न सकेका छैनौँ।  जसका कारण पार्टीमा कैयौँ कमजोरी र समस्या बढ्दै गएको छ ।’

प्रतिवेदनमा पार्टीमा सामूहिकता भन्दा व्यक्ति प्रधान हुने अभ्यास सो अनुशासन र आचारसंहिता प्रतिकूल गतिविधिको बढोत्तरी भएको समेत बताइएको छ । 

प्रतिवेदनमा विपद् व्यवस्थापन र समाधानभन्दा बढाउने प्रवृत्ति गोपनीयता भङ्ग र मिडिया ट्रायल पार्टी नेतृत्व र शीर्ष नेताहरूप्रति अमर्यादित सार्वजनिक टिप्पणीहरूले पनि पार्टीमा समस्या ल्याएको उल्लेख गरिएको छ ।