काठमाडौं– नेकपा (माओवादी) केन्द्रले सत्ताको नेतृत्व गरिरहेको नेकपा एमालेसँग एकता गर्ने नीति र सोच नरहेको बताएको छ । माओवादी केन्द्रका उपाध्यक्ष एवम् प्रवक्ता अग्निप्रसाद सापकोटाले सोमबार विज्ञप्ति जारी गरेर एमालेसँग पार्टी एकता गर्ने नीति र सोच नभएको प्रष्टिकरण दिएका हुन् । 
 
केही सञ्चारमाध्यमहरूमा माओवादी केन्द्रका वरिष्ठ उपाध्यक्ष नारायणकाजी श्रेष्ठले पूर्व राष्ट्रपति विद्यादेवी भण्डारीलाई भेटेर वाम एकताको प्रस्ताव गरेको दाबीसहित समाचार प्रकाशन भएको थियो । 

‘हाम्रो पार्टीको एमालेसँग एकता गर्ने नीति र सोच नरहेको स्पष्ट पार्दछौँ,’ प्रवक्ता सापकोटाले भनेका छन्, ‘वरिष्ठ उपाध्यक्ष नारायणकाजी श्रेष्ठले एमालेसँगको एकताका लागि पूर्व राष्ट्रपति विद्यादेवी भण्डारीसँग भेटेको कुरा पार्टीमा कुनै जानकारी छैन ।’ 

उनले एमालेबाहेकका अन्य कम्युनिस्ट पार्टी र समाजवादी मोर्चामा रहेका घटकहरूसँग एकताबारे छलफल भइरहे पनि एमालेसँग एकताको चर्चासम्म पनि नचलेको बताएका छन् ।