काठमाडौं- नेपाली कांग्रेसका नेता विमलेन्द्र निधीले पछिल्लो समय सर्वोच्च अदालतले दिएका केही आदेश र फैसलाहरू विवादास्पद बन्दै गएको भन्दै अब नेपालमा छुट्टै संवैधानिक अदालत गठन गर्नु आवश्यक रहेको बताएका छन्।

आइतबार ललितपुरको सानेपास्थित नेपाली कांग्रेस केन्द्रीय कार्यालयमा जारी केन्द्रीय कार्यसमिति बैठकमा बोल्दै निधीले न्यायपालिकाको भूमिकामाथि प्रश्न उठाउँदै भने, ‘सर्वोच्च अदालतले शक्ति पृथकीकरणको सिद्धान्त अवलम्बन गर्न छाडेकाले संविधानको मर्म र प्रणाली नै कमजोर हुँदै गएको छ। त्यसैले अब संवैधानिक अदालत छुट्टै बनाउनेतर्फ जानुपर्छ।’

नेता निधीले संवैधानिक अदालतको वकालत गर्दै भने, ‘संविधानको रक्षा र कार्यान्वयनका लागि संवैधानिक विषयहरू हेर्ने छुट्टै अदालत आवश्यक भइसकेको छ।’

निधीले संवैधानिक मुद्दाहरूमा कांग्रेसले अग्रसरता लिनुपर्ने आवश्यकता औँल्याउँदै भने अवकाशप्राप्त राष्ट्रपतिले राजनीतिमा आउने निर्णय गरेको कुरामा पार्टी गम्भीर हुनुपर्ने बताएका छन् ।

‘रिटायर्ट राष्ट्रपति राजनीतिमा फर्किन पाउने कि नपाउने भन्ने प्रश्न सामान्य होइन। यो कुनै एक दलको मात्र होइन, राजनीतिक प्रणालीसँग सम्बन्धित गम्भीर बहस हो। कांग्रेसले यस विषयमा स्पष्ट धारणा बनाउनु जरुरी छ’, उनले भने ।

निधीले पार्टीले अबको प्राथमिकता १५ औँ महाधिवेशन लक्षित संगठन सुदृढीकरणमा राख्नुपर्ने धारणा राखे। उनले निजामती कर्मचारी विधेयक, संवैधानिक नियुक्तिहरू र शक्ति सन्तुलनजस्ता विषयमा पार्टीले आन्तरिक छलफलमार्फत नीतिगत स्पष्टता ल्याउनुपर्नेमा जोड दिए।