धनुषा– साक्षर महिलाहरू पनि घरेलु हिंसाको सिकार भइरहेको तथ्याङ्क सार्वजनिक भएको छ ।

महिला पुनःस्थापना केन्द्र (ओरेक) ले मधेश प्रदेशको धनुषा र सर्लाहीमा महिला हिंसा सम्बन्धी कुल ६१ वटा लैङ्गिक विभेदमा आधारित हिंसाको तथ्याङ्क अभिलेखीकरण गर्दा हिंसा हुने मध्ये कुल ७७ प्रतिशत महिला साक्षर रहेको पाइएको छ ।

ओरेकले घटनाहरूलाई विश्लेषण गर्दा सबैभन्दा बढी ५४ प्रतिशत (३३ जना) महिला घरेलु हिंसाबाट प्रभावित भएको देखिन्छ, जसमा ७७ प्रतिशत महिलाहरू साक्षर रहेका छन् ।

त्यसैगरी, घरेलु हिंसा गर्ने आरोपितमा सबैभन्दा बढी ४९ प्रतिशत श्रीमानहरू रहेका छन् । अर्को, ७५ प्रतिशत घरेलु हिंसाका घटना मधेशी समुदायका परिवारमा भएको तथ्याङ्कले बताउँछ ।

महिलामाथि हुने हिंसाका घटनामा यौन हिंसा २३ प्रतिशत छ । जसमा ४४ प्रतिशत बलात्कारका घटना रहेका छन् ।
मधेश प्रदेशका धनुषा र सर्लाही जिल्लाबाट जनवरीदेखि मार्च २०२५ सम्म अर्थात् ३ महिना प्रतिवेदनमा उक्त तथ्याङ्क सार्वजनिक भएको हो ।

ओरेकले महिला तथा किशोरीमाथि हुने हिंसाका घटनाहरू सङ्कलन, व्यवस्थापन तथा अभिलेख गर्दै आएको छ ।

नेपाल प्रहरीको चालु आर्थिक वर्षको सार्वजनिक वार्षिक तथ्याङ्कअनुसार देशभर वार्षिक १६ हजारभन्दा बढी महिला घरेलु हिंसाबाट प्रभावित हुने गरेका छन् ।