जनकपुरधाम– नेकपा एमाले धनुषाको ८ औं जिल्ला अधिवेशनस्थलमा दुई गुटका नेता-कार्यकर्ताबीच मंगलबार फेरि झडप भएको छ । झडपमा दुई नेतासहित पाँच जना घाइते भएका छन् ।

घाइते हुनेहरूमा एमालेका भोला यादव पक्षीय सत्यनारायण महासेठ र महेश दास छन् । उनीहरू दुवै जनाको टाउको फुटेको छ ।

झडपमा निवर्तमान जिल्ला अध्यक्ष राजकिशोर यादवसमेत कुटिएका छन् । अधिवेशनमा अन्तिम नामावली प्रकाशनबारे भोला यादव र लक्ष्मीनारायण यादव पक्षबीच विवाद बढ्दा कुर्सी हानाहान भएको हो ।

निर्वाचन समितिका सदस्यलाई समेत केही नेताकार्यकर्ताले कुर्सी प्रहार गरेका छन् । भोला एमाले केन्द्रीय सचिव रघुवीर महासेठ पक्षबाट र लक्ष्मीनारायण यादव केन्द्रीय सदस्य उमाशंकर अरगरिया, सञ्‍जीव झा (सुरज) र मधेशका सभामुख रामचन्द्र मण्डल पक्षबाट अध्यक्षका प्रत्यासी हुन् ।

 झडपपछि अधिवेशनस्थल प्रहरीले नियन्त्रणमा लिएको छ । अहिले उक्त ठाउँबाट नेता कार्यकर्तालाई बाहिर निकालिएको छ ।