म्याग्दी– म्याग्दीको रघुगङ्गा गाउँपालिका–५ झिँमा एक करोड ४८ लाख रुपैयाँको लागतमा वडा कार्यालय भवन निर्माण भएको छ । आर्थिक वर्ष (आव) २०७९–८० मा सुरु भएको दुईतले सभाहलसहितको भवन निर्माण चालु आर्थिक वर्षमा सम्पन्न भएको हो ।

आव २०७९–८० मा ५० लाख रुपैयाँको लागतमा उपभोक्ता समितिमार्फत पाँचकोठे भवनको पहिलो तला ढलान भएको थियो । ७१ लाख ६६ हजार ४१५ मा २०८० चैतमा ठेक्का सम्झौता गरेको निर्माण कम्पनीले एक सय २० जना क्षमताको सभाहल, रङरोगन, विद्युत्, पानी, फर्निचरको काम गरेको थियो ।

चालु आर्थिक वर्षमा विनियोजन भएको २७ लाख बजेटबाट घेराबार गरेर पूर्णता दिइएको वडाध्यक्ष मनबहादुर शेरपुञ्जाले बताए । भवन निर्माण गर्न ५९ लाख खर्चेर चार रोपनी जग्गा खरिद गरिएको थियो । भाडाको घरमा सञ्चालित वडा कार्यालय नयाँ भवनमा सारिएको छ । नयाँ भवन बनेपछि सेवा प्रवाह सहज भएको छ । भाडाका लागि भइरहेको खर्च बचत भएको वडाध्यक्ष शेरपुञ्जाले बताए ।

आठवटा वडा रहेको गाउँपालिकाले यसअघि पाखापानीमा वडा नम्बर ६ र भगवतीमा वडा नम्बर २ का लागि भवन निर्माण गरेको थियो । वडा नम्बर ७ को कार्यालय साविक चिमखोला गाविसको भवनबाट सञ्चालन भइरहेको छ । वडा नम्बर १ बेगखोला, वडा नम्बर ३ पिप्ले, वडा नम्बर ४ दग्नाम र वडा नम्बर ८ कुइनेमङ्गलेको कार्यालय तत्कालीन गाविस, सामुदायिक विद्यालय भवनबाट सञ्चालित छन् ।

मौवाफाँटमा सभाहलसहितको भवन बनाएर कार्यालय सञ्चालन गरेको गाउँपालिकाले प्रशासकीय भवन निर्माणका लागि ठेक्का सम्झौता गरेको अध्यक्ष भवबहादुर भण्डारीले बताए । एक करोड १५ लाख ८६ हजार ४४७ कबोलमा निर्माण कम्पनीसँग ठेक्का सम्झौता भएको हो ।

ठेक्का प्रक्रियामा १० वटा निर्माण कम्पनी सहभागी भएका थिए । आगामी वर्ष पनि बजेट विनियोजन गरेर भवन निर्माणलाई निरन्तरता दिने गाउँपालिकाले जनाएको छ ।