काठमाडौं– नेपाल यु- १९ र अफगानिस्तानको यु- १९ क्रिकेट टोलीबीच तीन खेलको एक दिवसीय शृङ्खलाअन्तर्गत दोस्रो दिनको खेल जारी छ ।

मूलपानी क्रिकेट मैदानमा जारी खेलमा अफगानिस्तानले टस जितेर  पहिले ब्याटिङ गरेपछि नेपाल फिल्डिङमा उत्रिएको छ । यु- १९ पुरुष विश्वकपको एसिया छनोटको तयारीस्वरूप नेपाल र अफगानिस्तानले अभ्यास खेल खेलेका हुन् ।

यसअघि बिहीबार भएको पहिलो खेलमा नेपाल अफगानिस्तानसँग १३० रनको फराकिलो अन्तरमा पराजित भएको थियो ।

अफगानिस्तानले तीन खेलको सिरिजमा १–० को अग्रता बनाएको छ ।  यो सिरिजमा हारबाट जोगिन नेपाललाई आजको खेल जित्नुपर्ने दबाब छ । नेपाल आजको खेलमा पराजित भएमा यस सिरिजको उपाधि अफगानिस्तानले जित्ने छ ।

अर्को साता नेपालमा नै आयोजना हुने एसिया छनोटमा नेपाल, अफगानिस्तान, हङकङ, युएई र ओमानले प्रतिस्पर्धा गर्नेछन् ।