धनगडी– बुधबार झोलुङ्गे पुल मर्मत गर्ने क्रममा भेरी नदीमा खसेर बेपत्ता भएका दुई जनामध्ये एक जनाको शव भेटिएको छ । 

सुर्खेतको बराहताल गाउँपालिका–४ को कुटा र पञ्चपुरी नगरपालिका–१० को चाम्री जोड्ने झोलुङ्गे पुल मर्मतका क्रममा दुई जना मजदुर भेरी नदीमा खसेर बेपत्ता भएका थिए । 

आज सशस्त्र प्रहरी बल, नेपाल नं. ३२ रक्तकाली गण सुर्खेतबाट ६ जना गोताखोरसहितको टोलीले एक जनाको शव निकालेको डीएसपी शैलेन्द्र थापाले बताएका छन् । अर्का एक जना अझै बेपत्ता छन्, उनको खोजी कार्य जारी रहेको छ।

पूर्वी रुकुम जिल्लाको सिस्ने गाउँपालिका–२ स्थित प्वाङ बस्ने २४ वर्षीय अनिल घर्ती र १८ वर्षीय अर्जुन झाँक्री मगर निमार्णाधीन झोलुङ्गे पुलको लट्ठा तान्ने क्रममा माघ २३ गते दिउँसो सो नदिमा खसेका थिए ।