काठमाडौं– महिलाहरूको स्वास्थ्य एवं फिटनेसमा सचेतना जगाउने उद्देश्यले यही मार्च २२ गते ‘काठमाडौँ पिंक केयरएथन’ हुने भएको छ । 

लेजर पोर्ट नेपालले  यो कार्यक्रम गर्न लागेको हो । काठमाडौँ पिंक केयरएथनमा महिलाहरूको दौड, जुम्बालगायतका विभिन्न कार्यक्रम आयोजना हुनेछ। 

जुनसुकै उमेर समूहका महिलाहरूले सहभागिता जनाउन सक्ने यो इभेन्टको मुख्य उद्देश्य सधैँ घरायसी काम र दैनिकीमा व्यस्त रहने महिलाहरूलाई आफ्नो स्वास्थ्यको लागि पनि समय निकाल्न प्रेरित गर्नु रहेको आयोजक संस्था लेजर पोर्ट नेपालका अध्यक्ष नमराज जोशीले बताए । 

आयोजकले आज राजधानीमा आयोजना गरेको पत्रकार सम्मेलनमा दिएको जानकारी अनुसार पिंक केयरएथनमा यस पटक पच्चिस सयदेखि तिन हजार महिलाहरू सहभागी हुने अपेक्षा गरिएको छ । कलाकार उषा रजकलाई काठमाडौँ पिंक केयरएथनको गुडविल एम्वासडेटर घोषणा गरिएको छ ।

यसअघि काठमाडौँ पिंकाथनको नाममा हुने गरेको यो कार्यक्रम यस पटक अझ नेपालीपन झल्किने गरी काठमाडौँ पिंक केयरएथन नाममा आयोजना गर्न लागिएको हो । 

लेजर पोर्टले सन् २०१७ देखि २०१९ सम्म तिन वर्षसम्म लगातार आयोजना गरिएको काठमाडौँ पिंकाथन कोभिड महामारी र अन्य सामाजिक आर्थिक कारणले रोकिएको थियो । यो वर्ष इभेन्ट भव्यरुपले पुनरागमन हुने आयोजक संस्थाको दाबी छ ।