काठमाडौं– चीनको आर्थिक वृद्धिदर घट्दै गएको पाइएको छ । कोरोना भाइरसको महामारीअघि चीनको आर्थिक वृद्धिदर ६.५ प्रतिशत रहेकोमा अहिले घटेर ४.६ प्रतिशतमा खुम्चेको छ ।

चीनियाँ अर्थतन्त्रमा औद्योगिक क्षेत्रको उत्पादकत्व घटेकाले आर्थिक वृद्धिदरमा पनि आएको जनाइएको छ । अर्थशास्त्री पल क्रुगमान चीनले अनुत्पादक क्षेत्रमा लगानी गरेकाले औद्योगिक उत्पादकत्व घटेको बताउँछन् । उनका अनुसार चीनले घरजग्गाजस्तो अनुत्पादक क्षेत्रमा लगानीलाई बढाएकाले यस्तो अवस्था आएको हो ।

एशिया टाइम्सका अनुुसार आर्थिक वृद्धिदर घट्दा यसको प्रभाव चिनियाँ जनताको जीवन प्रत्यक्ष परिरहेको छ । जापान, दक्षिण कोरिया, ताइवानजस्ता अन्य एशियाली अर्थतन्त्र प्राविधिक शोध र उत्पादनमा लागेर उच्च आय भएका मुलुकमा स्तरोन्नति हुँदै गर्दा चिनियाँ अर्थतन्त्रमा भने थाइल्याण्डजस्तो मध्यम आय भएको मुलुककै शैलीमा आर्थिक वृद्धिदरमा कमी आएको छ ।

त्यसबाहेक उत्पादनशील जनसङ्ख्यामा गिरावट आएका कारण पनि चिनियाँ अर्थतन्त्र सुस्ताएको बताइन्छ । चीनमा सन् २०१० देखि उत्पादनशील जनसङ्ख्यामा कमी आउन थालेको हो । 

जनसङ्ख्या घट्दा एकातिर श्रम बजारमा प्रवेश गर्ने श्रमिकको सङ्ख्या घट्ने र अर्कोतर्फ आश्रित जनसङ्ख्या भने बढ्दै जाने हुँदा यसको असर चिनियाँ अर्थतन्त्रले खेप्नु परेको विश्लेषकहरू बताउँछन् ।