काठमाडौँ- नेपाली कांग्रेसले आगामी फागुन २१ गते हुने प्रतिनिधिसभा निर्वाचनमा उत्पन्न हुनसक्ने कुनै पनि सुरक्षा थ्रेटको जिम्मेवारी सरकारकै हुने स्पष्ट पारेको छ।

प्रधानमन्त्री निवास बालुवाटारमा बसेको सर्वदलीय बैठकमा सहभागीसहित धारणा राख्दै कांग्रेस प्रतिनिधि गगन थापा र पुष्पा भुसालले निर्वाचनमा सुरक्षा चुनौती देखिएकाले यसको जिम्मा सरकारले लिनुपर्ने बताएका हुन्।

नेतृ भुसालका अनुसार कांग्रेसले बैठकमा ‘कुनै प्रकारको सुरक्षा थ्रेट स्वीकार्य छैन’ भन्ने स्पष्ट सन्देश दिएको थियो। उनले भनिन्, ‘यदि कुनै थ्रेट भयो भने यसको पूर्ण जिम्मेवारी सरकारले लिनुपर्छ भन्ने कुरा हामीले प्रष्ट्याएका छौँ।’

उनले वर्तमान सरकारलाई निर्वाचन रोक्ने वा नगराउने छुट कतै नभएको प्रस्ट पारिन्।
‘यो सरकारले फागुन २१ गतेको निर्वाचन नगराउने विकल्प छैन,’ भुसालले भनिन्।

उनका अनुसार, प्रधानमन्त्री सुशीला कार्कीले पनि सरकार चुनाव गराउन पूर्ण रूपमा प्रतिबद्ध रहेको बताएका छन्।
‘हामी चुनाव सामाना गर्न तयार छौँ भन्ने सन्देश प्रधानमन्त्रीले सरकारी तर्फबाट दिनुभयो,’ उनले भनिन्।