काठमाडौं- नवघोषित नेपाली कम्युनिस्ट पार्टी देशकै एक नम्बर पार्टी हुने संयोजक पुष्कमल दाहाल प्रचण्डले बताएका छन् ।

विभिन्न १० दल मिलेर बनेको नवघोषित पार्टीको कार्यक्रमलाई सम्बोधनका क्रममा उनले यस्तो बताएका हुन् ।

उनले आफूहरू अबको चुनावपछि एक नम्बर हुने बताउँदै कसैको टाउको दुखेर केही नहुने जिकिर गरे ।

‘हाम्रो पार्टी, यो पार्टी अब एक नम्बर पार्टी भयो भयो । कसैलाई टाउको दुखेको हुन सक्छ’, उनले भने, ‘प्रतिक्रियावादीलाई निद्रा नलागेको हुन सक्छ । नलागोस् निद्रा, तर हामी अब एक नम्बर हुन्छौँ ।’

उनले आफूहरूको आत्मसमीक्षा र संकल्पलाई जनताले सुन्ने बताए । ‘तर हामी अहंकारमा जानु हुँदैन। हामीले अरूलाई पनि एकतावद्ध बनाउनु छ’, उनले भने, ‘माधव नेपाले भने जस्तै अब हामी जनतामाझ जान्छौँ, जनताले हामीलाई एक नम्बर बनाउनेछन् ।’