काठमाडौं– नेकपा एकीकृत समाजवादीका सम्मानित नेता झलनाथ खनालले आज माओवादी केन्द्रका संयोजक पुष्पकमल दाहाल प्रचण्डलाई भेट्ने भएका छन् । भेटघाट गर्ने स्थल भने टुङ्गो लागेको छैन ।

खनालका अनुसार आफ्नी पत्नी जेन-जी आन्दोलनमा घाइते हुँदा नेताहरूले देखाएको सद्भाव र मायालाई धन्यवाद दिनका लागि नेताहरूलाई भेट्न लागेका हुन् ।

खनालले हिजो पूर्व प्रधानमन्त्री केपी शर्मा ओलीलाई भेटेर आफूलाई देखाएको माया र सद्‌भावप्रति धन्यवाद दिएका थिए ।

‘मैले नेताहरूलाई भेटेर राजनीतिक कुरा गर्नेभन्दा पनि मप्रति देखाउनुभएको माया र सद्भावका लागि धन्यवाद दिन भेटेको हुँ’, खनालले खबरहबलाई भने, ‘नेताहरूसँग मेरो भेट्ने क्रम जारी छ । हिजो केपी कमरेडलाई भेटे आज प्रचण्ड कमरेडलाई भेट्दै छु। भोलि अन्य नेताहरूलाई पनि भेट्नेछु।’

खनालले ओलीको सँगको भेटमा पनि सन्चो बिसन्चो र पारिवारिक सम्बन्धको विषयमा कुराकानी बढी भएको बताए ।

राजनीतिक कुराकानीका क्रममा एमाले अध्यक्ष ओलीले एमालेमा प्रवेश गर्नेहरूका लागि समूहगत एकताभन्दा पनि व्यक्तिगत प्रवेशमा जोड दिने कुरा बताएको खनालले खबरहबलाई जानकारी दिए ।