काठमाडौं– जल तथा मौसम विज्ञान विभागले नेपालमा लगातार वर्षा गराउने न्यून चापीय प्रणाली देशबाट बाहिरिएको जनाएको छ ।

विभागकी प्रवक्ता विभूति पोखरेलले आइतबार दिउँसो सूचना जारी गर्दै मनसुन कमजोर भइसकेको र मौसममा सुधार देखिएको जानकारी दिइन् ।

यद्यपि, मनसुन अझै नेपालबाट पूर्ण रूपमा बाहिरिएको छैन । त्यसैले केही स्थानमा अझै वर्षा हुने सम्भावना रहेको छ । तर लगातार वर्षा नहुने विभागले स्पष्ट पारेको छ । विभागले मौसम तथा बाढीको सम्भावित अवस्थाको नियमित अनुगमन भइरहेको भन्दै आवश्यक सतर्कता अपनाउन आग्रह गरेको छ ।

विभागले जारी गरेको विज्ञप्तिमा बंगालको खाडीमा विकास भएको न्यून चापीय प्रणालीका कारण असोज १७ गते साँझदेखि १९ गते बिहानसम्म मनसुन अत्यन्त सक्रिय भएको उल्लेख छ ।