काठमाडौं– राष्ट्रिय प्रजातन्त्र पार्टी (राप्रपा)ले नेपाली कांग्रेसलाई जवाफ फर्काएको छ । प्रतिनिधिसभाको मंगलबारको बैठकमा सांसद दीपकबहादुर सिंहले कांग्रेसका प्रमुख सचेतक श्यामकुमार घिमिरेलाई जवाफ फर्काएका हुन् । 

सोमबारको बैठकमा प्रमुख सचेतक घिमिरेले रास्वपा र राप्रपालाई संसद्मा उभिएर अरुलाई गाली गरेर बाहिरिने प्रवृत्ति रोक्न सुझाव दिँदै अन्यथा प्रतिवादमा उत्रिने चेतावनी पनि दिएका थिए । 

‘हिजोमात्रै यस सदनमा भिजिट भिसाको नाममा बहिष्कार गर्नेहरूलाई हामी सभासद्हरूले प्रतिवादमा उत्रिनुपर्छ भन्ने कांग्रेसका प्रमुख सचेतकले भनिसक्नुभएको छ,’ राप्रपाका सांसद सिंहले भने, ‘के सरकारको सुशासन भएको यही हो । भिजिट भिसामा दैनिक ५० लाख असुली धन्दा गरेर हाम्रो छोराछोरीलाई विदेश पठाउने, ती विदेशमा गएका बिचल्ली हुँदा कुनै पनि वास्ता नगर्ने दिनको लागि गणतन्त्र ल्याएको हो ।’