काठमाडौं– राष्ट्रिय प्रजातन्त्र पार्टी (राप्रपा)ले प्रतिनिधिसभा बैठक बहिष्कारलाई निरन्तरता दिएको छ । गत जेठ १३ गतेदेखि भिजिट भिसा प्रकरणको छानबिनका लागि संसदीय समिति गठनको माग गर्दै आएको राप्रपाले मंगलबार पनि बैठक बहिष्कार गरेको छ ।   

बैठक सुरु भएपछि सभामुख देवराज घिमिरेले राप्रपाका सांसद दीपकबहादुर सिंहलाई बोल्ने अनुमति दिएका थिए । उनले भिजिट भिसा प्रकरणमा पार्टीले राख्दै आएको माग पूरा नभएकाले बैठक बहिष्कार गर्ने बताए । 

‘हामी सदन बहिष्कार गर्छौं । सदन बहिष्कार गर्दाखेरि हामीले पाउने भत्ता पनि बहिष्कार गरिराखेका छौँ,’ उनले भने । मंगलबार राष्ट्रिय स्वतन्त्र पार्टी (रास्वपा)ले पनि बैठक बहिष्कार गरेको छ ।