काठमाडौं– नेपाली कांग्रेसका सभापति शेरबहादुर देउवाले पूर्वप्रधानमन्त्री स्व. गिरिजाप्रसाद कोइराला नभएको भए नेपालमा गणतन्त्र आउने सम्भावना नै रहेको दाबी गरेका छन् । 

जय नेपाल फाउन्डेसनले शनिबार राष्ट्रियसभा गृहमा आयोजना गरेको कार्यक्रममा उनले गणतन्त्रबारे सोच्नसमेत नसकिने समयमा पूर्वप्रधानमन्त्री कोइरालाले राजतन्त्र ढाल्ने हिम्मत गरेको दाबी गरेका हुन् । 

‘गिरिजाबाबु धेरै लडाकु व्यक्ति हो । उहाँ नभएको भए गणतन्त्र आउने थिएन । त्यस्तो आँटिलो व्यक्ति हो,’ सभापति देउवाले भने, ‘हिम्मत भएको व्यक्ति हो । त्यो बेला मान्छेहरूले गणतन्त्र ल्याउनुपर्छ भनेर सोच्न पनि सक्दैन थिए । उहाँले हिम्मत गर्नुभएकै हो ।’ 

उनले कोइरालाको हिम्मत र समन्वयकारी भूमिकाका कारण पहिलो संविधानसभाबाट संविधान जारी नभए पनि गणतन्त्र आएको पनि जिकिर गरे । 

‘पहिलो संविधानसभाबाट संविधान बनेन,’ सभापति देउवाले भने, ‘तर, पहिलो संविधानसभाको पहिलो दिन मै गणतन्त्र पास भयो ।’ 

पूर्वप्रधानमन्त्री देउवाले नेपाललाई गणतान्त्रिक मुलुक बनाउने श्रेय कोइरालालाई जाने पनि बताए ।  

‘सच्चा मानेमा भन्ने हो भने गणतन्त्र ल्याउने पहिलो श्रेय गिरिजाप्रसाद कोइरालामा जान्छ,’ उनले भने, ‘उहाँले गणतन्त्र ल्याउनुभएको हो ।’