काठमाडौं– नेपाली कांग्रेसका नेता डा. शेखर कोइराला सय जनामध्ये ९० जनामा सकारात्मक सोच नै नरहेको टिप्पणी गरेका छन् ।

शनिबार राष्ट्रिय सभा गृहमा आयोजना गरेको ‘सकारात्मक सोच र जय नेपाल फाउन्डेसन’ विषयक गोष्ठीमा उनले यस्तो टिप्पणी गरेका हुन् । पूर्वप्रधानमन्त्री स्व. गिरिजाप्रसाद कोइरालाको जन्मोत्सवको अवसरमा जय नेपाल फाउन्डेसनले उक्त गोष्ठी आयोजना गरेको थियो । 

‘सकारात्मक सोच र जय नेपाल फाउन्डेसन जुन भनिएको छ, सकारात्मक सोचलाई कसरी लिनुभएको छ तपाईंहरूले ?,’ नेता कोइरालाले प्रश्न गर्दै भने, ‘केलाई सकारात्मक सोच भन्ने? म त दिनको सय जना त भेटिरहेको हुन्छु, ८०–९० जनामा म सकारात्मक देख्दैन ।’ 

उनले युवालाई आशावादी हुन आग्रह गर्दै केही गर्छु भन्ने सोच राख्न पनि आग्रह गरे ।

 ‘आशावादी नै हुनुहुन्न तपाईंहरू, आशावादी हुनुस्,’ नेता कोइरालाले भने, ‘केही गर्न सकिँदैन भन्ने होइन, अब मैले के गर्ने भन्ने कुरा सोच्नु प¥यो तपाईंहरूले ।’