काठमाडौं– राष्ट्रियसभा सदस्य बामदेव गौतमले मुलुकको अहिलेको व्यवस्थामाथि प्रहार गर्नेलाई नियन्त्रण गर्न कानुन बनाउनै पर्ने बताएका छन् ।  

सोमबार राष्ट्रियसभा बैठकमा सरकारको नीति तथा कार्यक्रममाथिको छलफलमा गौतमले फेरि पनि गद्दीमा बस्न खोज्नेहरूले विभिन्न षडयन्त्र गर्न खोजेको भन्दै अहिलेको व्यवस्थामाथि प्रहार गर्नेलाई नियन्त्रण गर्न कानुन बनाउनै पर्ने बताएका हुन् । 

गौतमले अहिले देशमा आन्दोलन नै आन्दोलन भइरहेको अवस्थामा त्यसलाई सामना गर्न प्रकाशज्योतिको कुनै शब्द नीति तथा कार्यक्रममा आफूले नपाएको तर्क गरे । 

उनले चारैतिर भ्रष्टाचार भएकाले विश्वमा नै नेपालको बदनाम हुन पुगेको अवस्थामा भ्रष्टाचारलाई समाप्त गर्ने अभियान नीति तथा कार्यक्रममा आउन नसकेको समेत धारणा राखे ।

उनले संविधानमा उल्लेख समाजवाद भन्दा अन्य व्यवस्थामा जान नसकिने जिकिर गरे । सरकारको नीति तथा कार्यक्रमलाई आफूले आलोचनात्मक समर्थन गर्ने उनको भनाइ छ ।