काठमाडौं – नेपाली कांग्रेसको पेशागत तथा बुद्धिजीवि विभागकी संयोजक डा. डिला संग्रौलाले संघीय संसद् सचिवालयले पत्रकारहरुको संसद् प्रवेश पास निलम्बन गरेको घटनाप्रति गम्भीर ध्यानाकर्षण भएको बताएकी छन् ।

प्रतिनिधिसभा बैठकपछि बाहिरिँदै गर्दा प्रधानमन्त्रीलाई प्रश्न गर्दा संसदीय मर्यादा र अनुशासनको उल्लघंन भएको भन्दै संघीय संसद् सचिवालयले पास निलम्बन गरेको घटनाले पत्रकारको आचारसंहिता प्रतिकुल भए नभएको मापन गर्ने क्षेत्राधिकार कसको हो भन्ने प्रश्न पनि उब्जाएको उनको भनाइ छ ।

उनले पत्रकारको पास निलम्बन फिर्ता लिई प्रेस स्वतन्त्रताको सम्मान गर्न संघीय संसद्समक्ष आग्रह समेत गरेकी छन् ।

प्रधानमन्त्रीलाई संसद परिसरमा संसदीय मर्यादा र अनुशासनको उल्लघंन गर्दै प्रश्न सोधेको भन्दै संघीय संसद् सचिवालयले पत्रकार किशोर श्रेष्ठ र प्रकाश ओलीको पास निलम्बन गरेको थियो ।