भोजपुर- आगामी फागुन २१ गते तय भएको प्रतिनिधिसभा सदस्यको निर्वाचनलाई लक्षित गर्दै भोजपुरमा मतदाता नामावली सङ्कलन तथा अद्यावधिकमा उत्साहजनक सहभागिता देखिएको छ।

जिल्ला निर्वाचन कार्यालय भोजपुरका प्रमुख केशवकुमार शङ्खरका अनुसार, कार्यालयमा दैनिक ५० देखि ६० जना मतदाताले नामावली दर्ता गराइरहेका छन्। सेवाग्राहीको चाप बढ्दै गएपछि कार्यालयले सेवा समय बिहान ८ बजेदेखि साँझ ६ बजेसम्म विस्तार गरेको छ।

शङ्खरका अनुसार, सेवाग्राहीको चाप बढे पनि दरबन्दीअनुसारका कर्मचारी नहुँदा सेवा प्रवाहमा केही कठिनाइ भएको छ। कार्यालयमा हाल छ जनाको दरबन्दीमध्ये चार जना मात्र कार्यरत छन् भने कम्प्युटर अपरेटरको पद रिक्त रहँदा झनै समस्या भएको कार्यालयको भनाइ छ ।

कार्यालयले नेपाली नागरिकताको प्रमाणपत्रका साथ व्यक्तिगत रूपमा उपस्थित भई नामावली दर्ता गर्न सकिने जनाएको छ। साथै, सङ्कलनको क्रममा विगतका नामावलीमा भएका त्रुटि सच्याउने, नामावली ठाउँ सार्नेलगायतका कामहरू पनि भइरहेको छ। ठूला चाडपर्व सकिएकाले अब सेवाग्राहीको चाप अझ बढ्ने अनुमान गरिएको छ।