काठमाडौं- नेपाली कांग्रेसका महामन्त्री गगनकुमार थापाले आगामी पुस १६ गतेदेखि १९ गतेसम्म पार्टीको १५ औँ महाधिवेशन गर्ने प्रस्ताव गरेका छन्।

केन्द्रीय कार्यसमितिको मंगलबार सानेपामा बसेको बैठकमा महामन्त्री थापाले विस्तृत तालिकासहित महाधिवेशनको मिति प्रस्ताव पेस गरेका हुन्।

थापाले यही मंसिरमा महाधिवेशन गर्नुपर्ने भए पनि सर्वसम्मतिका लागि मध्यमार्गी बाटो खोजेर पुसमा महाधिवेशन गर्ने प्रस्ताव अघि सारेका हुन् ।

उनले पार्टीका नेता र कार्यकर्ताबीचको एकता बलियो बनाउन कुनै हालतमा फागुन २१ गतेको चुनावअघि नै महाधिवेशन गर्नुपर्ने अडान राखेका छन् ।

तर कार्यवाहक सभापति पूर्णबहादुर खड्का नेतृत्वको संस्थापन पक्ष फागुन २१ को चुनावमा भाग लिएर आगामी वैशाखमा महाधिवेशन गर्नुपर्ने पक्षमा छन् ।

कांग्रेसका खड्का पक्षको बहुमत रहेकाले थापाले गरेको प्रस्ताव पास हुन भने कठिन छ । अहिले नेता डा. शेखर कोइराला, महामन्त्री विश्वप्रकाश शर्मा र उपसभापति धनराज गुरुङसहितको इतर समूहले पहिले महाधिवेशन अनि मात्रै निर्वाचनको अडान राखिरहेको छ ।