काठमाडौं– नेकपा (माओवादी केन्द्र) महाधिवेशन आयोजक समितिको बैठक मंगलबार दिउँसो प्रज्ञा प्रतिष्ठानको हल कमलादीमा बसिरहेको छ ।

अध्यक्ष पुष्पकमल दाहाल प्रचण्डले माओवाद र प्रचण्ड पथ दोस्रो पटक त्याग्दै मार्क्सवादी लेनिनवादी विचारलाई अंगाल्ने निर्णय गरेपछि माओवादी केन्द्रको यो अन्तिम बैठक हो ।

यस अन्तिम बैठकबाट प्रचण्डले नयाँ तय नभइसकेको ९ दल सम्मिलित नयाँ दलमा माओवादीलाई समाहित गराउने निर्णय लिनेछन् ।

नेकपा एकीकृत समाजवादीसहित ९ दलबीच भएको एकता सहमति अनुमोदनका लागि बैठक बसेको हो ।

तर उता माओवादी छोडेर नयाँ अभियानको घोषणाको तयारीमा रहेका पूर्वउपमहासचिव जनार्दन शर्माले अहिले पत्रकार सम्मेलन गरिरहेका छन् ।

प्रचण्डले माओवादी त्याग्दै गर्दा जनार्दनले भने अर्का नेता राम कार्कीसहितको उपस्थितिमा पत्रकार सम्मेलन गरिरहेका छन् ।

उनले माओवादी पुनर्गठन या अन्य नयाँ अभियान घोषणा गर्न सक्नेछन् । उनले सोमबार प्रचण्डलाई आफूले नयाँ एकताको निर्णयलाई अस्वीकार गरेको भन्दै बिदा मागेका थिए ।