काठमाडौं– प्रधानमन्त्री केपी शर्मा ओली र नेपाल कम्युनिष्ट पार्टी (माओवादी केन्द्र) का अध्यक्ष पुष्पकमल दाहाल ‘प्रचण्ड’बीच अहिले सिंहदरबारमा छलफल भइरहेको छ ।

प्रधानमन्त्री तथा मन्त्रिपरिषद्को कार्यालय, सिंहदरबारमा प्रधानमन्त्री ओलीले प्रमुख प्रतिपक्षी दलका नेतासँग संवाद गरेका हुन् ।

ओलीले प्रमुख प्रतिपक्षी दलका नेता दाहालसँग सङ्क्रमणकालीन न्यायमा केन्द्रित रहेर छलफल गरिरहेको उनको सचिवालयले जनाएको छ । उक्त छलफलमा समसामयिक विषयमा पनि कुरा भइरहेको बताइएको छ ।

यो छलफलबारे प्रचण्डको सचिवालयले पनि पुष्टि गरेको छ । यो छलफलमा प्रमुख सत्तारूढ नेपाली कांग्रेस सहभागी छैन ।

यसअघि टीआसीबारे ओली, प्रचण्ड र नेपाली कांग्रेसका सभापति शेरबहादुर देउवासहित त्रिपक्षीय छलफल हुने गरेको थियो ।

तर पहिलो पटक ओलीले माओवादी नेतृत्वसँग अलग्गै संवाद गरेका हुन् । दुई नेताबीचको यो संवादलाई अर्थपूर्ण मानिएको छ ।

यस भेटमा प्रधानमन्त्रीले मानव अधिकारसम्बन्धी सल्लाहकार एवम् एमाले नेता अग्नि खरेललाई सहभागी गराएका छन् । उता प्रचण्डले उपमहासचिव वर्षमान पुनलाई साथमा राखेका छन् ।