काठमाडौं– भारतीय प्रधानमन्त्री नरेन्द्र मोदीले नेपालसँगको सम्बन्धलाई ठूलो प्राथमिकता दिइएको बताएका छन् । 

थाइल्यान्डको बैंककमा शुक्रबार प्रधानमन्त्री केपी शर्मा ओलीसँगको भेटपछि सामाजिक सञ्जाल एक्समा नेपाली भाषामै उनले यस्तो लेखेका छन् ।  

‘बैंककमा प्रधानमन्त्री केपी शर्मा ओलीसँगको भेटघाट फलदायी रह्यो। भारतले नेपालसँगको सम्बन्धलाई ठूलो प्राथमिकता दिएको छ,’ भारतीय प्रधानमन्त्री मोदीले लेखेका छन् । 

उनले आफूहरूबीच भारत–नेपाल मित्रताका विभिन्न पक्षसँगै ऊर्जा, कनेक्टिभिटी, संस्कृति र डिजिटल प्रविधिजस्ता क्षेत्रहरूमा छलफल भएको पनि उल्लेख गरेका छन् । 

‘हामीले भारत–नेपाल मित्रताका विभिन्न पक्षहरू विशेष गरी ऊर्जा, कनेक्टिभिटी, संस्कृति र डिजिटल प्रविधि जस्ता क्षेत्रहरूमा छलफल गर्‍यौँ,’ मोदीले लेखेका छन्, ‘हामीले यस वर्षको बिम्स्टेक शिखर सम्मेलनबाट प्राप्त केही प्रमुख सकारात्मक परिणामहरू विशेष गरी विपद् व्यवस्थापन र समुद्री यातायातका क्षेत्रहरूमा पनि कुरा गर्‍यौँ ।’ 

प्रधानमन्त्री ओलीले पनि एक्समा हिन्दी भाषामै मोदीसँगको भेट अत्यन्त सार्थक र सकारात्मक रहेको उल्लेख गरेका छन् । 

‘मेरे प्रिय मित्र, प्रधानमंत्री श्री नरेन्द मोदीजी से आत्मीय भेंट हुई । हमारी बातचीत अत्यंत सार्थक और सकारात्मक रही । इस सौहार्दपूर्ण मुलाकात पर हर्ष व्यक्त करता हूँ,’ प्रधानमन्त्री ओलीले लेखेका छन् । 

प्रधानमन्त्री ओलीले नेपाली समयअनुसार अपरान्ह ४ बजेर २० मिनेटमा एक्समा लेखेको देखिएको छ । त्यसको दुई मिनेटपछि भारतीय प्रधानमन्त्री मोदीले लेखेका छन् ।