काठमाडौं- नेपाली कांग्रेसका महामन्त्री गगन थापा आगामी पुस २७ गतेदेखि काठमाडौंमा हुने १५औं महाधिवेशनमा सभापतिमा उठ्ने तयारीमा जुटेका छन् ।

थापानिकट नेताहरूका अनुसार उनले सभापतिमा उठ्नका लागि टिम निर्माणदेखि अन्य रणनीतिक तयारी थालेका हुन् ।

उनकै सचिवालयका एकजना सदस्य शंकर कुइँकेलका अनुसार थापाले १५ औं महाधिवेशनमा सभापतिमा उठ्ने तयारी गरिरहेका छन् ।

कांग्रेसबाट वर्तमान सभापति शेरबहादुर देउवा बिदा हुँदा गगनसहित १४ औँमा पराजित नेता डा. शेखर कोइराला र कार्यवाहक सभापति पूर्णबहादुर खड्का पनि बलिया दाबेदार हुन् ।

‘गगन दाइले सभापतिका लागि तयारी गरिरहनुभएको छ । त्यसका लागि उहाँ योग्य हुनुहुन्छ’, कुइँकेलले भने, ‘जेन-जी आन्दोलनपछिको परिस्थिति र वर्तमान नयाँ पुस्ताले खोजेको नेतृत्वका लागि उहाँको योग्यताका पुग्छ । उहाँ यसपटक सभापतिमा जसरी पनि उठ्नुहुन्छ ।’

कुइँकेलले अहिले थापा क्रियाशील सदस्यमा देखिएको विवाद मिलाउने काममा लागिरहेका छन् । बुधबार पनि थापा त्यही बैठकमा सहभागी थिए ।

गगन अहिले आफ्नो टिम कस्तो बनाउने दिशामा छलफलमा छन् । ‘टिम कस्तो बन्छ अहिले पूरै छलफल हुन पाएको छैन । यो पटक सभापतिको उम्मेदवारीबाट उहाँ पछि हट्नुहुन्न’, उनी भन्छन् ।

कांग्रेस संस्थापन इतर समूहका नेता थापाले सभापतिमा उठ्ने तयारी गरेसँगै अन्य नेताका लागि चुनौती भएको छ। संस्थापन इतरबाट नेता कोइराला यस पटक पनि उठ्दैछन् । गगन र शेखरबीचको आगामी वार्ता र छलफलले पनि सभापतिको उम्मेदवार तय गर्नेछ ।

डा. शेखर कोइरालाले मंगलबार खबरहबसँगको कुराकानीमा आफू १५ औँ महाधिवेशनमा सभापतिको दाबेदार रहेको बताएका थिए ।