काठमाडौं- ६१ किलो सुन तस्करी प्रकरणमा संलग्न जीवन चलाउनेविरुद्ध काठमाडौं जिल्ला अदालतमा दुई अर्ब सात करोड ६२ लाख रुपैयाँकाे सम्पत्ति शुद्धीकरणको मुद्दा दायर भएको छ। सम्पत्ति शुद्धीकरण अनुसन्धान विभागले मष्टा ग्रुप प्रालिका सञ्चालकसमेत रहेका चलाउनेले सुन तस्करीबाट कमाएको रकम प्रयोग गरी देशका विभिन्न जिल्लामा जग्गा खरिद गरेको प्रमाण फेला परेपछि मुद्दा दायर गरेको हो।

अनुसन्धानका क्रममा चलाउनेले झापा, काठमाडौं, रौतहट र काभ्रेपलाञ्चोकमा ३२ कित्ता जग्गा खरिद गरेको भेटिएको छ। जसको अनुमानित मूल्य करिब १५ करोड ३० लाख ५१ हजार रुपैयाँबराबर रहेको छ। काठमाडौंको गोठाटारस्थित घर–जग्गा समेत उनले अन्य व्यक्तिका नाममा खरिद गरेको देखिएको विभागले जनाएको छ।

अनुसन्धानअनुसार चलाउनेले अवैध सुन कारोबारबाट प्राप्त रकमलगायत गरी कुल दुई अर्ब सात करोड ६२ लाख १३ हजार ५१६ रुपैयाँ शुद्धीकरण गरेको अभियोगपत्रमा उल्लेख छ।

‘खरिदको कुल मूल्य समेत गर्दा हुन आउने कुल रकम रू. १,४५,५४,०३,९४८ तथा विदेशबाट अवैध तरिकाले आयात गरेको सुन ६० केजी ७१६ ग्रामको तत्कालीन अवस्थाको मूल्य प्रतितोला रू. १,१२,५०० का दरले हुने कुल मूल्य रू. ५८,५६,०९,५६८ र हिमालयन बैंकमा निजका नाउँमा रहेको नं. ००२१०५५००१९००१३ को खातामा कसुरबाट प्राप्त गरी जोर जम्मा गरी कारोबार गरी निःसर्ग गरेको रकम रू. ३,५२,००,००० समेत गरी हुने कुल रकम रू. २,०७,६२,१३,५१६ प्रतिवादी जीवन चलाउनेले शुद्धीकरण गरेको पुष्टि हुन आयो,’ अभियोगपत्रमा भनिएको छ।

चलाउनेको सम्बन्ध बेल्जियम नागरिक दावा छिरिङसँग पनि देखिएको अनुसन्धानमा खुलासा भएको छ। राजस्व अनुसन्धान विभागले २०८० साउन ३ गते मोटरसाइकलको ब्रेक प्याडभित्र लुकाएर ल्याइएको ठूलो परिमाणको सुन बरामद गरेको थियो। त्यसबेला झन्डै एक क्विन्टल सुन भन्सार जाँच पास भएर बाहिरिएको भनिए पनि पछि जोख्दा ६१ किलो मात्र सुन फेला परेको थियो।

१९ दिनपछि उक्त घटनामा संगठित अपराधको तत्व देखिएको भन्दै विभागले थप अनुसन्धानका लागि प्रतिवेदन केन्द्रीय अनुसन्धान ब्युरो (सीआईबी)लाई जिम्मा दिएको थियो। त्यस क्रममा सीआईबीले सो समूहले यसअघि नै ३०२ किलो सुन तस्करी गरेको निष्कर्ष निकालेको थियो।

सीआईबीले त्यस प्रकरणमा दावा छिरिङ, जीवन चलाउनेसहित २९ जनालाई प्रतिवादी बनाएर सुन भन्सार चोरी पैठारी र संगठित अपराधसम्बन्धी मुद्दा दायर गरेको थियो।