काठमाडौं – दोलखाको गौरीशङ्कर गाउँपालिका–९ अन्तर्गत रहेको गौरीशङ्कर र रोल्वालिङ हिमशृङ्खलामा आरोहणका लागि गएका सात जनाको हिमपहिरोमा परेर मृत्यु भएको छ । मृतकमध्ये पाँच विदेशी नागरिक रहेका छन् ।

सशस्त्र प्रहरीका अनुसार आज बिहान यलुङरी हिमालको आधारशिविर नजिकै गएको ठूलो हिमपहिरोमा परेर उनीहरूको ज्यान गएको हो । घटनामा अन्य पाँच जना घाइते भएका छन् ।मृतकहरूको पहिचान भने अहिलेसम्म खुलेको छैन।

प्रहरीका अनुसार उद्धारका लागि नेपाली सेना, नेपाल प्रहरी र सशस्त्र प्रहरी बलका टोलीहरू घटनास्थलतर्फ पठाइएका छन् । मौसम प्रतिकूल भएकाले उद्धार कार्यमा कठिनाइ भइरहेको जनाइएको छ ।

रोल्वालिङ क्षेत्र हालको मौसममा हिमपहिरोको उच्च जोखिमयुक्त मानिन्छ, जहाँ पछिल्ला वर्षहरूमा पटक–पटक यस्ता घटनाहरू दोहोरिइरहेका छन् ।