हानोई – भियतनामको उत्तर–पश्चिमी पहाडी क्षेत्रहरूमा आएको लगातार वर्षाका कारण परेको बाढीमा परी कम्तीमा १० जनाको ज्यान गएको भियतनाम विपद् व्यवस्थापन अधिकारीहरूले आइतबार जनाएका छन् ।

मुख्य प्रभावित क्षेत्रः ‘दिएन बिएन’
सबैभन्दा बढी असर दिएन बिएन प्रान्तको टिया डिन्ह र सा डुङ क्षेत्रमा परेको छ, जहाँ बाढीले १० जनाको मृत्यु र सात जना घाइते बनाएको भियतनामको कृषि मन्त्रालयले जनाएको छ ।

वर्षाका कारण बाढी र पहिरो
बिहीबारदेखि शनिबारसम्म लगातार परेको भारी वर्षाले आकस्मिक बाढी ल्याएको थियो । बाढीले धेरै गाउँहरूलाई बाह्य सम्पर्कबाट टाढा बनाएको छ, जसका कारण उद्धार र राहत कार्यमा कठिनाइ आएको छ ।

उद्धार प्रयास र राहत वितरण
शनिबार उद्धार टोलीहरूले हेलिकप्टरमार्फत बाढीबाट अड्किएका बासिन्दासम्म पुगेर खाद्यान्न, औषधि र अन्य आवश्यक सामग्री वितरण गरेका थिए । प्रभावित मानिसहरूलाई सुरक्षित स्थानहरूमा सारिएको छ । आइतबार साँझसम्म अधिकांश क्षेत्रमा बिजुली र सञ्चार सेवा पुनः सुरु गरिएको छ ।

कृषिमा ठूलो क्षति
गत महिना मात्रै पनि, सोन ला प्रान्तमा आएको यस्तै बाढीले पाँच जनाको ज्यान लिएको थियो । बाढीले खेतीबाली, चौपाया र कुखुरा समेत बगाएर ठूलो आर्थिक क्षति पु¥याएको थियो ।

विगतको आँधीको विनाश
सन् २०२४ को सेप्टेम्बरमा आएको टाइफून यागीले भियतनाममा ठूलो विनाश ल्याएको थियो, जसमा ३४५ जनाको मृत्यु भएको थियो र करिब ३।३ अर्ब डलर बराबरको आर्थिक क्षति भएको अनुमान गरिएको थियो ।